Sekretáriu Estadu komunikasaun Sosiál, Merício Juvinal dos Reis ‘Akara’. Imajen Tatoli/António Gonçalves

DILI, 05 jullu 2021 (TATOLI)—Sekretáriu Estadu Komunikasaun Sosiál (SEKOMS), Mericio Juvinal dos Reis ”Akara”, klarifika notísia ne’ebé públika iha mídia nasionál balun katak moras variante Delta COVID-19 tama ona iha Timor-Leste ne’e laloos, no husu ba mídia atu fornese informasaun loloos ba públiku.

“Kona-ba mídia balun ohin públika iha headline katak “variante foun Delta tama ona iha Timor” ne’e, daudaun ne’e ha’u simu informasaun hosi Ministériu Saúde no Sentru Integradu no Jestaun ba Krize (CIGC-sigla portugés) katak informasaun ne’e laloos. Labele fiar tanba variante foun tama ka la tama ne’e, tenke liuhosi teste laboratóriu. Ne’ebé, ha’u husu ba mídia sira tenke kuidadu no kontribui ba situasaun, nune’e ita labele halo ita-nia sidadaun pániku tanba ita-nia rain iha situasaun pandemia nia laran,” Mericio Juvinal dos Reis Akara informa liuhosi plenária, segunda ne’e.

Nia esplika, atu identifika variante foun ka lae ne’e tenke haruka ba Austrália hodi teste no presiza semana tolu hanesan ne’e mak bele identifika loloos variante foun ne’e tama iha Timor ka lae, maibé até agora laiha teste laboratóriu ruma ne’ebé deteta kona-ba variante foun ne’e.

Sekretáriu Estadu Komunikasaun Sosiál ne’e fó-sai katak, iha grupu tolu mak eziste iha Timor-Leste hodi barralla informasaun kona-ba pandemia COVID-19 nian kompostu hosi grupu ida-ne’ebé ho intensaun hakarak lansa dezinformasaun hodi destabiliza de’it situasaun.

Grupu daruak mak halo miss informasaun ho ignoránsia ho informasaun la kompletu no grupu ida ikusliu mak grupu ida-ne’ebé hakarak halo má-informasaun.

“Iha duni evidénsia no faktu katak ema sira-ne’e hakarak lansa beibeik atubele halo kanek de’it ema-nia sentimentu, halo moe de’it ema, entaun grupu tolu ne’e funsiona. Entaun, ha’u husu mídia tenke mai ho pensamentu krítiku bainhira rekolla informasaun, tenke buka-hatene informasaun mai hosi ne’ebé,” nia fó hanoin ba mídia nasionál sira.

Nia husu públiku fiar de’it informasaun ofisiál hosi Ministériu Saúde no Sentru Integradu ba Jestaun Krize no labele fiar informasaun hosi fatin sira seluk.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here