Xefe Kaza Sivil Prezidénsia Repúblika, Francisco Maria de Vasconcelos, entrega materiál ba komunidade Aldeia Assi-Ermera. Imajen/Mídia PR.

DILI, 05 jullu 2021 (TATOLI)—Prezidénsia Repúblika apoiu materiál konstrusaun hanesan sumentu saka-40 no mangeira hodi halo kruz boot iha kapela Assi, aldeia Assi, Suku Haufu, Postu Administrativu Letefoho Munusípiu Ermera.

Xefe Kaza Sivil Prezidénsia Repúblika, Francisco Maria de Vasconcelos, antes entrega ekipamentu, tatoli uluk mensajen hosi Prezidente Repúblika Francisco Guterres Lú Olo ba komunidade katak Prezidente Repúblika nia domin no hakoak-boot ba komunidade sira hotu.

Tanba, nia dehan, Prezidente Repúblika nia kompromisu katak “Prezidente ba Povu Tomak” tanba ne’e uitoan ka barak Xefe Estadu tau matan ba povu, tanba kada semana, Xefe Estadu ko’alia ho Primeiru Ministru hodi haree povu nia dezenvolvementu.

“Maun-alin sira, buat ki’ik-oan liu hanesan liman-kukun de’it mak oferese mai iha ne’e (sarani kapela Assi) simentu uitoan no mangeira hodi tulun ita-boot sira. Ita-boot sira mak tenke hakaas-aan liu. Ami fó apoiu uitoan para ita-boot sira serbisu maka’as liután,” Francisco Maria de Vasconcelos liuhosi komunuikadu imprensa ne’ebé Agência Tatoli asesu, segunda ne’e.

Tanba ne’e, nia husu ba inan-aman sira liu-liu agrikultór sira atu esforsu hodi hadi’a Estadu liu hosi kontribuisaun ida-idak nian maibé tenke hamutuk hadi’a rai Timor-Leste hahú hosi hadi’a uluk iema ida-idak nia-aan.

Xefe Kaza Sivil agradese ba reasaun hosi komunidade tanba nakonu ho domin maske iha sofremente oioin, maibé ida ne’e mak hatudu timor-oan nia sentimentu ba malu ho dignidade.

Entretantu Ministru Administrasaun Estatál (MAE), Miguel Pereira de Carvalho, reafirma katak sofrementu ne’ebé komunidade hasoru kuaze hanesan iha teritoriu Timor-Leste.

Maske VIII Governu Konstitusion’al iha planu ne’ebé di’ak maibé iha impedementu oioin ne’ebé Timor-Leste hasoru mak hanesan pandemia COVID-19 ne’ebé sei kontinua sai ameasa boot, no dezastre naturál ne’ebé estraga dezenvolvementu barak.

Govenante ne’e justifika katak, VIII Governu Konstitusionál sei esforsu hodi hadi’ak nafatin povu nia sofrementu ba estrada, eletrisidade, bee-moos, tanba área hirak ne’e nu’udar baze hodi fasilita hadi’ak komunidade nia moris iha área sosiál no ekonomia.

Nia dehan, maske Prezidente Repúblika la’ós órgaun ezekutivu maibé iha vontade hodi solidariza apoiu tuir kbiit no kapasidade, hodi hakmaan komunidade nia sofrimentu.

Entretantu serimónia entrega ekipamentu materiál konstrusaun ne’e, hala’o iha sábadu (03/06), ne’ebé dirijé hosi Xefe Kaza Sivil Prezidénsia Repúblika Francisco Maria de Vasconcelos no akompaña hosi Ministru Administrasaun Estatál, Miguel Pereira de Carvalho no autoridade Ermera.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here