VIQUEQUE, 05 jullu 2021 (TATOLI)—Populasaun 2.395 hosi suku Luca, postu adiministrativu Viqueque Villa, munisípiu Viqueque simu ona Cesta Bázika.
“Ha’u-nia populasaun simu hotu ona Cesta Bázika. Autoridade lokál haree katak, produtu ne’ebé iha la tuir kompromisu Governu-nian tanba sasán sira ne’e tau hamutuk ho folin to’o $30,” Xefe suku Luca Bribato Guterres, hateten ba jornalista Agência Tatoli, segunda ne’e.
Notísia relevante:Cesta Bázika la kontribui másimu ba rekuperasaun ekonomia
Maski nune’e, nia konsidera programa ne’e diak tanba bele hakmán ona populasaun sira-nia sofrimentu iha situasun pandemia COVID-19.
Nia husu atu, bainhira Governu hakarak kontinua programa ne’e iha futuru, tenke kontrola kompañia implementadór-sira tanba rezultadu ne’ebé iha hatudu katak, Governu deside presu $50 per ema ida, maibé fornesedór-sira implementa la to’o.
“Ha’u sujre ba Governu atu kontrola programa hanesan ne’e. Miabé, tenke kontrola másimu ba presu produtu, nune’e bele fó satisfasaun ba ita-nia populasaun. Ha’u hakarak agradese ba Governu ne’ebé implementa ona programa ne’e,” lnia agradese.
Produtu ne’ebé populasaun simu iha programa Cesta Bázika mak haesan, foos, batar-ikis, kafé, masin midar no mina.
Iha fatin seluk Adiministrdór Postu Munisípiu Viqueque Villa, António Grigório haktuir, distribuisaun Cesta Bázika iha postu administrativu Viqueque Villa, iha suku sanulu inklui suku Luca finaliza ona, iha mós reklamasaun balun hosi benifisiáriu-sira.
Adiministradór ne’e hatutan, distribuisaun iha postu adiministrativu Viqueque Villa hosi Sentro Lojístika Nasionál (CLN) no Ministériu Turizmu no Komérsiu (MTK) mak halo distribuisaun.
Suku Luca kompostu hosi aldeia Ailor, Uma boot, Hira Mer no aldeia Uma Loot.
Jornalista: Vitorino Lopes da Costa
Editór: Cipriano Colo
