Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 05 jullu 2021 (TATOLI)—Partidu Demokrátiku lideradu Mariano Assanami ‘Sabino’ no António da Conçeicão ‘Kalohan’ sei hein Prezidente Repúblika, Francisco Guterres ‘Lú Olo’ dekreta loron eleisaun hafoin ne’e mak Partidu Demokrátiku (PD) sei anunsia ninia kandidatura Prezidente Repúblika hodi kompete iha Eleisaun Prezidensiál 2022. 

Ita tenke hein Prezidente Repúblika dekreta lai  data ba eleisaun prezidensiál ninian tanba ne’e por a caso agora ita seidauk rona. Ha’u hanoin karik mós Prezidente Repúblika sei hein tempu mak atu halo dekreta ida-ne’e,” Sekretáriu Jerál Partidu Demokrátiku (PD), António da Conceição ‘Kalohan’ informa ba jornalista sira, iha resintu uma fukun, segunda.

Partidu Demokrátiku sei hein pronunsiamentu loron eleisaun hosi Prezidente Repúblika, tan ne’e mak to’o agora PD seidauk halo konferénsia ruma atu hola desizaun kona-ba kandidatura ne’e.

“Kandidatu sira-ne’ebé iha potensiál ne’e iha maibé desizaun ida-ne’e seidauk iha tanba partidu iha ninia mekanizmu rasik, katak bainhira iha kanididatu liu na’in-rua (hosi partidu). Kuandu liu na’in-rua ona presiza iha kandidatu nia laran hodi bele haree katak partidu atu rekomenda ida-ne’ebé,” nia dehan.

Nia dehan, Partidu Demokrátiku sai hanesan vida responsabilidade iha nasaun ninian, tanba ne’e mak tenke iha kandidatura ruma ne’ebé mak atu hamriik ba Estadu.

Sekretáriu Jerál Partidu Demokrátiku ne’e sei hein to’o novembru no dezembru bainhira Xefe Estadu pronunsia ona loron eleisaun prezidensiál maibé iha inísiu ein prinsípiu PD sei iha kandidatu.

Entretantu, maske Prezidente Repúblika, Francisco Guterres ‘Lú Olo’ seidauk dekreta loron eleisaun prezidensiál nian maibé Prezidente Partidu Kmanek Haburas Unidade Nacional Timor Oan (KHUNTO), Armanda Berta dos Santos anunsia ofisialmente kona-ba ninia kandidatura.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here