Komandu Jerál PNTL, liuhosi unidade médika, hamutuk ho serbisu saúde munisípiu Dili, kontinua sensibiliza membru-sira iha munisípiu Dili, kona-bá importánsia hosi vasina AztraZeneca no Sinovac, iha Caicoli, segunda (05/07/21). Imajen Tatoli/Nelson de Sousa.

DILI, 05 jullu 2021 (TATOLI)—Komandu Jerál Polísia Nasionál Timor-Leste (PNTL), liuhosi unidade médika, hamutuk ho serbisu saúde munisípiu Dili, kontinua sensibiliza membru-sira iha munisípiu Dili, kona-bá importánsia hosi vasina AztraZeneca no Sinovac.

Segundu Komandate PNTL Dili, Superitendente, João Sanches Pires, hateten atividade ne’e importante tebes atu enkoraza membru-sira, nune’e bele simu vasina.

Notísia relevante:Sidadaun 210.000 iha TL simu ona vasina doze dahuluk

“Ita koordena ho serbisu saúde munisípiu Dili no parte saúde PNTL atu bele  fó sensibilizasaun ba membru-sira ne’ebé seidauk vasina hodi bele hatene,  maibé la ho obrigatóriu, fila-fali ba konsiénsia atu  simu tanba polísia nu’udár liña frente,’’ João Sanches, hateten ba jornalista-sira iha komandu munisípiu Dili, segunda ne’e.

Alende informasaun ne’ebé membru-sira hetan, bele transmite fila-fali ba komunidade, hodi hasa’e liu-tán partisipasaun ema-nian nune’e hetan vasina.

Iha sensibilizasaun ne’e membru-sira hato’o preokupasaun kona-bá impaktu hosi vasina ne’e ba moras tensaun, rins, diabetes ho sira-seluk atu bele simu vasina kala’e, nune’e hetan tiha esplikasaun hosi parte saúde balun konsege konvensidu no prontu simu vasina.

Tuir dadus hosi Komadu PNTL Dili iha membru 400-resin mak simu ona vasina doze primeiru ho segundu no menbru 100-resin mak seida’uk simu vasina.

Membru ne’ebé partisipa iha sensibilizasaun ne’e hamutuk 30-resin hosi eskuadra sira iha Dili, no hafoin sensibilizasaun parte saúde mós oferese vasina ba membru-sira ne’ebé seida’uk hetan.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here