Japaun Intenasional Cooperation Agency (JICA) iha Timor-Leste, Goto Ko. Imajen Tatoli/Francisco Sony

DILI, 05 jullu 2021 (TATOLI) – Governu Japaun liuhosi  Japan Intrnational Cooperation Agency (JICA) estabelese ona akordu ho Governu Timor-Leste hodi fasilita Funsionáriu Públiku (FP)  na’in-24 ba hasai sira-nia kursu mestradu iha Japaun ho bolsu estudu ne’ebé hanaran JDS (The Project for Human Resource Development Scholarship by Japanese Grand Aid).

Notísia Relevante : Durante Tinan 20, JICA Apoia Ona Millaun $480 ba Governu Timor-Leste iha Área Prioridade Tolu

Goto Ko hanesan Chief Representative ka Country Director JICA nian iha Timor – Leste, esplika ajuda ne’ebé Japaun oferese ba Timor-Leste hodi haruka timoroan sira ba eskola iha Japaun hanesan meiu ida hodi hasae koñesimentu FP sira nian iha área oi-oin.

“Projetu haruka funsionáriu timoroan sira ba eskola iha Japaun ne’e, akordu ami ho Governu Timor-Leste asina iha 2018, maibé nia realizasaun haruka FP sira ba eskola ne’e iha 2019 hamutuk ema na’in-24,” Goto Ko hateten hodi responde  Agência Tatoli iha edifísiu JICA, Dili, segunda ne’e.

Bolseiru funsionáriu públiku Timoroan hirak ne’e ba estuda iha area espesífiku haat (4) mak hanesan, Administrasaun Públiku, Edukasaun, Saúde no Turizmu.

Estudante hirak ne’e, agora dadauk hala’o hela estudu iha Japaun hahú iha 2019-2021 foin remata no fila mai Timor-Leste. Tuir dadus ne’ebé iha FP hirak ne’e balun hosi Ministériu Finansas (MF), Ministériu Turizmu, Komérsiu no Indústria (MTKI), Ministériu Interiór (MI) no seluk tan.

Ajuda mós iha setór agrikultura

Bainhira ezisténsia JICA iha Timor – Leste ajuda mós Governu Timor- Leste liu hosi hasae produsaun lokál sira agrikultura nian.

“JICA halo ona kooperasaun ho Ministériu Agrikultura no Peska (MAP) iha programa ida atu haree liu ba hasae produsaun foos-lokal ka foos-rai. Objetivu hosi programa ne’e atu hasae rendimentu agrikultór sira-nian,  oinsá atu mellora atividade sira hadi’a produsaun rai-laran no oinsá atu promove ita nia foos-rai, ne’e mak hanesan agora ita iha loja agrikultura nian rua; ida iha Timor Plaza no ida iha Mei Mart, Fatuhada,”  Goto Ko hateten.

Ho servisu ne’ebé parte rua kria bele fó biban ona ba agrikultór sira bele lori sira nia produtu ba fan iha loja rua ne’ebé Governu no JICA prepara ona.

Atu mellora servisu di’ak liu iha agrikultura, Japaun mós haruka nia ema professional na’in-neen (6) servisu hamutuk ho Ministériu Agrikultura no Peska hodi tun direita ba terrenu hamutuk ho agrikultór-sira no fatin ne’ebé implementa projetu refere ida iha Maliana no ida iha Vemasse, Baucau.

Bainhira projetu ne’e hala’o fó biban duni ba agrikultór sira hodi fa’an sira-nia produtu balun ba Sentru Nasionál Lojístika (CLN) no balun iha loja agrikultura.

Jornalista       : Hortencio Sanchez

Editór             : Francisco Simões

1 KOMENTÁRIU

  1. Agradece ba Governo Japaun, Nia Misaun iha Timor Leste, Ami la selu Ita Bot Sira Nia Doasaun Maibe Koperasaun furak Idak ne bele Dezenvolve Ita Nia relasun Bilateral husi Timor-Leste Ho Governo Japaun.

HAKEREK NO HATÁN

Please enter your comment!
Please enter your name here