Prezidente Konsellu Ezekutivu INCT, José Cornélio Guterres. Imajen Tatoli/Francisco Sony

DILI, 05 jullu 2021 (TATOLI) – Institutu Nasionál Siénsia Teknolojia (INCT) kontinua realiza formasaun hakerek proposta peskiza bá dosente investigadór-sira tanba formasaun dahuluk iha 2020 rezultadu hosi proposta ne’ebé dosente sira hakerek laiha kualidade, la atrativu no la hamosu mudansa ruma iha prosesu dezenvolvimentu nasaun.

Notísia Relevante : INCT hakarak halo peskiza iha área prioridade lima

“Ami kontinua formasaun hakerek proposta ne’e tanba ita haree esperiénsia, tinan kotuk, dosente barak submete sira-nia proposta peskiza ne’e laiha kualidade, ladún atrativu no la hamosu proposta ne’ebé inovativu atu transforma no kontribui bá dezenvolvimentu nasionál,” prezidente Konsellu Ezekutivu INCT, José Córnelio Goterres, informa bá jornalista-sira iha salaun Ian Martin, INFORDEPE, Balide, Dili, segunda ne’e.

INCT kontinua loke fai formasaun daruak bá dosente na’in-36 hosi Instituisaun Ensinu Superiór Públiku no Privadu (IESPP) 18 ne’ebé eziste atu hetan fali formasaun ida di’ak hodi bele hakerek proposta peskiza ho atrativu no bele hamosu mudansa ruma iha prosesu dezenvolvimentu nasaun nian.

Tuir José Córnelio formasaun hakerek proposta ne’e sei uza tipu rua; hakerek puru no hakerek peskiza aplikada.

Peskiza puru ne’e maka oinsá ema atu halo iha laboratóriu kona-bá teste ran hodi hamosu fali siénsia foun.

Peskiza aplikada maka atu apoiu polítika na’in-sira bele formula sira-nia polítika.  Tanba ne’e, formasaun ne’e ba dosente-sira sei uza tipu rua ne’e dala ida.

Formadór hakerek proposta investigadór iha INCT, João Cãncio da Costata Freitas. Imajen Tatoli/Francisco Sony

Iha fatin hanesan formadór João Câncio Freitas, nu’udar eis ministru edukasaun hateten, bá dosente 36 ne’ebé hetan formasaun hakerek proposta peskiza katak durante loron lima formasaun ne’e husu atu iha konsentrasaun. Tanba formasaun hakerek proposta peskiza ne’e la hanesan ho proposta baibain.

Nia esplika, proposta peskiza atu konvense ema seluk atu fó ninia apoiu tenke relevante ho area temátiku hosi proponente nian.

“Proposta ne’ebé ita hakerek tenke hatudu kapasidade atu konvense donator ne’ebé lee ita-nia proposta no bele fó nia osan bá ita atu bele realiza atividade  peskiza sira,” João Câncio Freitas esplika.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here