Ospitál Rejionál Eduardo Ximenes (Horex, sigla portugés) munisípiu Baucau. Imajen TATOLI/Natalino Belo

BAUCAU, 05 jullu 2021 (TATOLI)–Xefe Departamentu Kontrolu Kualidade no Komunikasaun Sosiál Ospitál Rejionál Eduardo Ximenes (Horex, sigla portugés) munisípiu Baucau, Claudino Ximenes, hateten, daudaun ne’e implementa hela teste swab COVID-19 ba pasiente baixa no ambulante inklui família ne’ebé ho sintoma respiratóriu ho razaun evita transmisaun vírus sai maka’as liután iha rejiaun ne’e.

“Pasiente ne’ebé mai, la’ós tenki submete ba teste swab hotu, maibé ida ne’ebé mai ho sintoma de’it. Enkuantu pasiente baixa ho família rua de’it, sira ne’e tenki swab ho razaun pasiente sira barak ho kondisaun ladún di’ak no tanba hein bele lori risku ba pasinte seluk inklui pesoál saúde,” Xefe Departamentu informa iha ninia knaar fatin, Villa nova, segunda ne’e.

Nia esplika, prosesu swab estabelese hahú kedan tau pesoál ida iha entrada portaun ospitál, nune’e bainhira pasiente ka vizitante iha sintoma respiratóriu bele submete ba teste swab no hein rezultadu sai mak foin kontinua konsulta.

Prosesu ne’e implementa tamba respiratóriu hanesan sintoma ne’ebé hanesan ho COVID-19, enkuantu ne’ebé mak laiha sintoma respiratóriu nafatin konsulta hanesan baibain.

“COVID-19 kuaze hanesan ho moras respiratóriu, entaun bainhira tama iha portaun entrada, ekipa halo teste ba sira ne’ebé iha sintoma,” nia akresenta.

Pasiente ne’ebé halo transferénsia hosi munisípiu Lautém no Viqueque no postu administrativu neen hosi munisípiu Baucau, molok atu halo atendementu ka baixa, obrigatóriumente nafatin halo swab inklui ba família na’in-rua ne’ebé hein pasiente.

Durante treazen, Horex detekta kazu pozitivu kada loron ida pur volta na’in-lima hosi pasiente inklui família.

Kuandu deteta pozitivu, parte Horex diretamente kontaktu ho Sala Situasaun, Sentru Intergradu Jestaun Krize (CIGC, sigla pprtugés) munisípiu Baucau atu halo tratamentu kontinuasaun ba pasiente baixa no COVID-19 iha izolamentu.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here