Grupu Sorghum Mokatil transforma Sorghum ba ai-han moderna. Imajen/Mídia RAEOA-ZEESM.

OÉ-CUSSE, 05 Jullu 2021 (TATOLI)—Sekretáriu Rejionál Asuntu Komérsiu no Indústria, Pedro da Cunha, hateten Departamentu Indústria prepara ona grupu Sorghum Mokatil haat (4) iha Rejiaun Administrativa Espesiál Oé-Cusse Ambeno (RAEOA) atu transforma (prodús) ai-han Sorghum ba hahan moderna.  

Nia hatutan, hosi grupu haat (4) ne’e grupu rua (2) hetan ona formasaun liuhosi treinamentu indústria inovativu atu oinsá transforma materia prima Sorghum ba produsaun bolu Sorghum, boliñu Sorghum no krupuk Sorghum.

“Grupu Sorghum sira-ne’e autoridade RAEOA harii kedas iha tinan 2019, ho sira-nia atividade prinsipál mak kuda materia prima Sorghum ho espésie tolu (3) mak hanesan Sorghum Bioguma, Sorgum Africa ho Sorgum lokál. Grupu sira-ne’e sei transforma materia prima Sorghum ba produsaun bolu Sorghum, boliñu Sorghum no krupuk Sorghum,” Pedro da Cunha hateten ba Agência Tatoli, iha nia servisu fatin, Pante Makasar, Oé-Cusse, segunda ne’e.

Grupu rua (2) ne’ebé ekipa Komersiu no Indústria fó treinamentu no forma sira atu transforma Sorghum ba fali ai-han modern mak Grupu ida iha Nipani, sub-rejiaun Pante Makasar no grupu ida seluk iha suku Uistasae, sub-rejiaun Oésilo.

“Objetivu hosi atividade ida-ne’e motiva sira lori produtu sira ba merkadu nomós prepara sira atu hatudu iha feira produtu lokál rejionál ninian. Komunidade hosi sub-rejionál sira bele uza produtu ne’e atu hatudu ba públiku kona-ba funsionamentu Sorghum ne’e nia modelu ne’e oinsá. Tanba, ita agora prepara ona grupu rua (2) simu ona treinamentu, hela grupu rua (2) iha sub-rejiaun Pasabe no ida ida sub-rejiaun Nitibe mak seidauk,” nia esplika,

Entretantu Xefe Departamentu Indústria, Calisto Quefi, hateten foin primeira-vez sira fó treinamentu ba grupu sira-ne’e, nune’e iha koñesementu ba transformasaun ai-han Sorghum ba ai-han moderna nian.

“Atividade ne’ebé ami hala’o ba ita-nia komunidade sira iha baze, sira orgullu no iha vontade atu habarak-tan fini Sorghum tanba durante ne’e sira halo ho maneira tradisionál de’it. Ne’ebé, ho  Departementu Indústria nia prezensa iha sira-nia leet sira kontente tanba ida-ne’e buat foun ba sira,” nia dehan.

Entretantu Xefe Grupu Haburas Fini Sorghum hosi suku Usitasae, sub-rejiaun Oésilo, Angelo Sila, hateten kada tinan komunidade sira kuda ai-han Sorghum iha to’os to’o tempu kolleta sira uza ba han de’it, maibé ho prezensa ekipa Departamentu Indústria konsege hanorin sira oinsá bele trasforma ai-han Sorghum sai fali hahan seluk.

“Sorghum ne’e ita bele dehan ai-han tradisionál. Ita-nia bei-ala sira moris mai han de’it ai-han ne’e. Maibé foin dadauk autoridade sira mai fó treinu, kapaas tebe-tebes, ida-ne’e bele hanorin ita atu transforma ai-han tradisonál ne’e ba modernu nian,” nia dehan.

Grupu Sorghum sira ne’ebé eziste iha RAEOA mak Grupu Rai Ketan Sorghum Mokatíl iha bairru Oébone, aldeia Bausiu, suku Nipani, sub-rejiaun Pante Makasar, Grupu Haburas Fini Sorghum iha bairru Pune, aldeia Pune, suku Usitasae, sub-rejiaun Oésilo, Grupu Sorghum Mokatil iha bairru Bimeni, aldeia Pasabe, Suku Abani, sub-rejiaun Pasabe no Grupuu Sorghum Mokatil iha suku Lela-Ufe, sub-rejiaun Nitibe.

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here