DILI, 05 jullu 2021 (TATOLI)—Espoza Prezidente Repúblika, Cidália Nobre Lopes Mouzinho Guterres, ohin, entrega tasa primeiru lugar ba ekipa feminina basketball  Labroratóriu Nasionál no ba manan-na’in sira seluk iha torneu Basketball Tasa Primeira Dama ne’ebé realiza iha 2020.

Espoza Prezidente Repúblika, Cidália Nobre Lopes Mouzinho Guterres, hateten nia parte sente onradu tanba inisiativa ne’ebé mak Federasaun Nasionál Basketball Timor-Leste (FNBTL) realiza iha ámbitu kampaña ‘Hapara Violénsia Haosru Feto no Labarik” ne’e, bele ensera no ohin bele entrega premiu ba manan na’in sira.

Diskursu Espoza Prezidente Repúblika, Cidália Lopes Nobre Mouzinho Guterres, iha serimónia entrega prémiu ba vensedór Taxa Primeira Dama iha Palásiu Prezidensiál Nicolau Lobato, segunda (05/07). Imajen Tatoli/Francisco Sony.

“Onra mai ha’u ensera programa ohin hodi rekoñese ita-boot sira-nia talentu ne’ebé mak hatudu liuhosi partisipa no sai vensedór ba Tasa Primeira Dama ne’ebé realiza iha 11-31 dezembru 2020. Tasa Primeira Dama nu’udar inisiativa dahuluk Federasaun Nasionál Basketball Timor-Leste (FNBTL) hodi halo kampaña ‘Violénsia Hasoru Feto no Labarik,” Espoza PR hateten iha diskursu serimónia entrega Tasa Primeira Dama, iha resintu Palásiu Prezidensiá Nicolau Lobato, Bairru Pite, Dili, segunda ne’e.

Iha kampaña ‘Violénsia Hasoru Feto no Labarik’ ne’e, Espoza PR hateten, uza desportu nu’udar meu atu hametin amizade, solidariedade no espíritu sprotividade iha komunidade no esperansa atu atleta basketball sira bele hala’o desportu hanesan rekreasaun ida hodi kontribui no promove família saudável, hapara violénsia, haforsa no habrani feto hodi hala’o sira-nia moris.

Iha biban ne’e, Espoza PR kongratula atleta sira ne’ebé partisipa no sai vensedór iha Primeira torneu Tasa Primeira Dama, no espera katak inisiativa ne’e sei kontinua ba oin la’ós de’it iha nível nasionál maibé abranze no akumula grupu atleta sira iha munisípiu atu sira mós sente hetan konsiderasaun no oportunidade atu hatudu sira-nia talentu.

“Ha’u fiar ho partisipasaun hatu-hotu nian iha ezersísiu ida-ne’e, sei hamosu fini di’ak ne’ebé iha esperiénsia atu kompete no hamorin Timor-Leste nia naran iha internasionál. Importante mak hahú agora presiza investe ho sériu no profisionál atu asegura talentu sira-ne’e hodi kontinua buras ba beibeik no prepara fízika no psikolojikamente atu kompete,” nia hateten.

Espoza PR enkoraja Federasaun Nasionál Basketball Timor-Leste (FNBTL) atu servisu ho parseiru esensiál hanesan Governu, universitária no eskola atu prepara joven no atleta ne’ebé mak Governu bele fó tulun liuhosi bolsa de estudu.

Inan nasaun ne’e enkoraja Governu liuhosi Sekretária Estadu Juventude no Desportu (SEJD) atu investe iha infraestrutura bázika, hadi’a kampu basketball sira liuhosi  integra iha planu no orsamentu ba tinan 2022.

“Nune’e, atleta sira iha espasu atu azerse sira-nia talentu. Espera iha futuru, inisiativa di’ak ne’e, hetan apoiu liután hosi Prezidensia Repúblika,” nia dehan.

Hatán ba sujestaun hosi Espoza PR, Vise-Prezidente FNBTL, Madalena Carlos Perreira hateten tebes duni torneiu ne’e realiza ba partisipante sira iha munisípiu maibé tanba preparasaun ne’e semana rua de’it, entaun Komisaun Organizadora deisde realiza de’it iha Dili.

“Karik iha tinan ne’e ita realiza mak sei nafatin ho patrosinadór Raul Lemos ka hetan tan doadór seluk, mak ita sei implementa iha área rurál no ita mós haree ona kampu basketball nian atu hadi’a ne’ebé iha munisípiu balun. Ami hakarak halo ba ema hotu maibé presiza iha ema hotu nia kontribuisaun tanba agora de’it ami la’o mesak de’it,” nia hateten.

Kona-ba envolvimentu estudante sira-nian, nia dehan, kamada hotu-hotu bele halo tanba sira iha kompeténsia atu realiza torneiu basketball ne’e maibé presiza servisu no kolabora hamutuk ho ministériu relevante sira.

Entretantu Prezidente Federasaun Nasionál Basketball Timor-Leste (FNBTL), Joaquim Gusmão, sente orgullu no agradese ba patrosinadór Raul Lemos tanba okaziaun ida-ne’e marka hela istória importante iha ámbitu dezenvolvimentu desportu liu-liu iha modalidade basketball nian.

Ekipa Vensedór Taxa Basketball Primeira Dama. Iha Palasiu Prezidente, segunda (05/07). Imajen Tatoli/Francisco Sony.

“Agradese ba Empreza RayaTex & Atramor, espesialmente ba Raul Lemos ne’ebé mós hatudu ninia vontade hodi kontribui ba dezenvolvimentu desportu liuhosi modalidade basketball. Maske ho limitasaun no kapasidade ne’ebé FNBTL enfrenta, FNBTL ho apoiu morál hosi Sekretaria Estadu Juventude Desportu (SEJD), nafatin halo esforsu atu bele realiza eventu ne’e,” nia dehan.

Iha fatin hanesan reprezentante ekipa vensedora, Petronela Rita Marques, hateten sira kontente no onradu tanba sira bele sai manan na’in maske iha dezafiu balun ne’ebé sira enfrenta hanesan tempu limitadu tebes ba sira atu halo preparasaun.

“Ha’u orgullu tanba ami-nia instituisaun Laboratóriu Nasionál mak sai manan na’in ba Torneiu Tasa Primeira Dama ne’ebé primeira-vez hala’o. Ba oin, ami hakarak esforsu liután atu tinan ne’e karik FNBTL realiza ami hakarak sai nafatin vensedór ba taxa rotativa, tanba tasa rotativa ne’e katak bainhira ekipa ida mak kontinua manan to’o dala tolu mak nia sai na’in ba tasa refere,” nia dehan.

Manan-na’in ba Torneu Tasa Primeira Dama tinan 2020 nian mak primeiru lugar okupa hosi ekipa basketball femenina hosi Laboratóriu Nasionál, segundu lugar mak ekipa hosi Ministériu Edukasaun, Juventude no Desposrtu (MEJD), terseiru lugar mak ekipa Ministériu Obra Públika (MOP) no kuartu lugar mak ekipa Ministériu Finansa (MF).

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here