Estudante Eskola Sekundária Tekniku Vokasionál Teknolojia Industrial Becora, Dili. Imajen/Egas Cristovao

DILI, 05 jullu 2021 (TATOLI) – Eskola ensinu báziku no ensinu sekundáriu jerál no tékniku vokasionál iha Dili laran, hahú halo preparasaun hodi hein desizaun Ministériu Edukasaun nian atu re-ativa  ensinu aprendizajen prejensiál.

Notísia Relevante : Eskola Téknika Vokasionál Becora hasoru difikuldade asesu fundu hosi MEJD

Diretór Servisu Edukasaun Munisípiu Dili (SEMD), Duarte Bragansa, informa to’o oras ne’e iha ona atividade lubuk ida maka eskola sira prepara intermus vasinasaun,  inklui limpeza no instala fasilidade prevensaun COVID-19 .

“Ita halo daudaun ona observasaun bá eskola sira iha Dili, barak mak hatudu ona kondisaun preparadu tebes. Intermus atividade limpeza, vasinasaun bá profesór-sira inklui instala ona ekipamentu bee-moos bá estudante sira atu fase-liman,” Duarte Bragansa informa ba Agência  iha edifísiu edukasaun, Comoro, Dili, foin lalais ne’e.

Nia esplika eskola sira halo preparasaun tanba sira hetan ona informasaun katak entre loron 20 to’o loron 25 jullu ne’e, Ministériu Edukasaun sei re-ativa atividade eskola sira.

Hosi sorin seluk, Diretór Eskola Ensinu Sekundáriu Tékniku Vokasionál Otelaria Turizmu (STVHT), Carles Fátima Guterres, informa ninia eskola hahú ohin sei realiza atividade limpeza iha eskola hodi prepara kondisaun ba prosesu aprendizajen prejensiál.

“Ami involve profesór, funsionáriu inklui estudante-sira atu hamoos eskola ne’e hodi hein atu re-ativa prosesu ensinu aula prejensiál,” nia hateten.

Diretór eskola ne’e mós akresenta katak Eskola Tekvok Becora iha profesór na’in-38 no hosi totál ne’e, na’in-33 simu ona vasina no falta na’in-lima (5) mak seidauk vasina tanba profesór na’in-rua (2) sei fó susu ba bebé, na’in-tolu (3) kondisaun saúde la permite.

Dadus estudante ne’ebé rejistadu iha eskola Tekvok Hotelaria Turizmu  Becora, hamutuk na’in-540. Eskola mós seidauk halo identifikasaun dadus estudante ho idade 18 bá leten atu hetan vasina.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here