Estudante EBC Santa Úrsula halo ezersísiu matéria hodi kompleta valor períodu dahuluk, segunda (05/07). Imajen TATOLI/Natalino Belo

BAUCAU, 05 jullu 2021 (TATOLI)–Koordenadór Eskola Báziku Katólika (EBC, sigla portugés) Santa Úrsula, Ruben Silva Soares Pereira, konsidera implentasaun eskola online durante Serka Sanitária seidauk efetivu tamba maioria estudante laiha telemóvel.

“Ami iha eskola Santa Úrsula sente ne’e la efetivu tamba desvantajen mak alunu barak la asesu ho razaun tamba laiha telefone, maski iha inan-aman maibé to’o tempu atu kontaktu, inan-aman sai bá serbisu no alunu hela iha uma,” Koordenadór eskola hateten iha ninia knaar fatin, Villa nova, segunda ne’e.

Nia haktuir, fulan hirak liuba, eskola katólika ne’e koko implementa ona eskola online maibé estudante barak la asesu, entaun deside kria sistema distribusaun matéria inklui ho ezersísiu ba estudante sira no halo konsultasaun direita entre alunu ho profesór.

“Nia rekezitu, estudante sira mai foti rezumu matéria no iha tempu hanesan ami halo ezersísiu ruma hodi kompleta valór,” nia akresenta.

Daudaun ne’e, parte EBC halo ezersísiu hodi kompleta valór durante períodu dahuluk ne’ebé sei ramata iha loron 17 jullu 2021 no posibilidademente sei estende tuir kondisaun alunu.

Tuir Diretór Eskola, kondisaun ne’e difikulta tebes tanba bainhira iha ezame online, estudante primeiru no segundu siklui balun la uza telemóvel, enkuantu pre-sekundária estudante balun iha ona telefone.

EBC nafatin implementa regra prevensaun COVID-19 hosi Ministeiru Saúde (MS) no Organizasaun Mundiál Saúde (OMS), hanesan distansiamentu fíziku, uza máskara no fase liman bainhira iha aula.

“Aula ida iha na’in-10, balun tolu to’o lima, ou ema 15 mai karaik,” nia hatutan.

Antes ne’e, parte Dirijente eskola hato’o ona difikuldade ne’ebé hasoru durante implentasaun eskola online, nune’e parte edukasaun munisípiu autoriza distribuisaun matéria ba alunu ne’ebé laiha telefone.

Ministériu Edukasaun Juventude no Desportu (MEJD) nasional fó sai ona munisípiu ne’ebé mak sei iha hela Serka Sanitária sei ezame sumativu enkuantu ne’ebé livre ona sei ezame formativu.

Entretantu, totál estudante iha EBC Santa Úrsula hamutuk ema 408, hosi total profesór 17.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here