Defensor Públiku Jerál, Câncio Xavier. Imajen Tatoli/Dok

DILI, 05 jullu 2021 (TATOLI)—Defensoria Públika konsidera meiu deklara riku-soin ba Komisaun Anti Komisaun (CAC sígla porugés), liu hosi lei númeru 7/2020 26 agostu, Medida Preventiva no Kombate Korrupsaun (MPCC sígla portugés), importante atu bele kontribui ba governasaun di’ak.

“Defensoria Públika nu’udár instituisaun Estadu prontu kolabora bainhira arrolamentu remata sei ba deklara  riku-soin, hodi kontribui promove boa governasaun iha kontestu transparánsia,’’ Defensór Públiku Jerál, Câncio Xavier, hateten ba jornalista Agência Tatoli via telefónika, segunda ne’e.

Notísia relevante:Deklara riku-soin, CAC husu partisipasaun ministériu hotu-hotu

Câncio Xavier, hateten tuir lei funsionáriu-sira iha instituisaun ne’e hanesan ofisiál justisa no defensór-sira, nu’udár pesoál ne’ebé serbisu iha área esensiál, ne’ebé tenke deklara riku-soin, nune’e instituisaun ne’e submete ona ofisiál justisa na’in 47 no defensór públiku 34 iha prosesu arollamentu.

To’o 24 juñu, CAC liuhosi Diresaun Prevensaun no Sensibilizasaun simu ona lista funsionáriu hamutuk 2.380-resin hosi kargu xefia hanesan Diretór Jerál, Diretór Nasionál no xefe departamentu hosi instituisaun Estadu hamutuk 28, ba prosesu arrolamentu deklarasaun riku-soin no bens interese.

CAC hasai ona notifikasaun iha nível Ministériu, Sekretária Estadu, Prezidente Autoridade no instituisaun autónoma besik 90 ba prosesu arrolamentu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here