Transporte Bombeiru hodi atende insénsiu, iha munisípiu Baucau, segunda (05/07). Imajen TATOLI/Natalino Belo

BAUCAU, 05 jullu 2021 (TATOLI)–Komandante Korpu Bombeiru munisípiu Baucau, José Cabral, hateten, daudaun ne’e enfrenta hela menus transporte no ekipamentu hodi hala’o servisu bainhira atu normaliza dezastre ka inséndiu ruma.

“Fasilidade menus tebes, maibé nafatin halo atendimentu tuir kondisaun ne’ebé daudaun iha, ami iha kareta ida,” Komandante Korpu Bombeiru informa ba Agência TATOLI, iha ninia knaar fatin, Villa antiga, segunda ne’e.

Ekipamentu protesaun pesoál hosi Bombeiru Baucau. Imajen TATOLI/Natalino Belo

Nia esplika, kareta ne’ebé limitadu, halo funsionáriu susar atu atende lalais bainhira mosu akontesementu ruma.

“Protesaun pesóal sufisiente, maibé menus iha kareta, dala-ruma distánsia dook difikulta tamba kareta ida de’it,” José akresenta.

Totál funsionáriu iha Korpu Bombeiru Baucau hamutuk 22 inklui Komandante ne’ebé fahe ba ekipa tolu hodi halo rotasaun durante oras 24 nia laran.

Ba kestaun ne’e, parte responsável hato’o ona pedidu no lamentasaun inklui edifísiu integradu ba Governu sentrál, tanba ne’e sei iha prosesu nia laran.

Transporte Bombeiru ne’ebé ho kondisaun a’at , iha Servisu Bombeiru Baucau, Villa antiga, segunda (05/07). Imajen TATOLI/ Natalino Belo

“Espera ami-nia pedidu sira bele atende, ami husu aumenta kareta inséndiu tanba ami presiza tebes, ida de’it ami labele halo atendimentu di’ak no ekipamentu seluk hanesan estintor,” nia hatutan.

Durante tinan 2021, mosu akontesementu iha fulan ida nia laran másimu liu rua, enkuantu prosesu antendimentu bainhira hetan kontaktu hosi vítima ou Polísia Nasionál Timor-Leste (PNTL) Komandu munisípiu Baucau, normalmente Bombeiru direitamente to’o iha fatin akontesimentu hodi atua situasaun.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here