Vise-Prezidente ANPM ba Asuntu Explorasaun no Exploitasaun Minerál, José Gonçalves. Imajen TATOLI/Francisco Sony

DILI, 05 juñu 2021 (TATOLI)—Vise-Prezidente Autoridade Nasionál Petróleu no Minieru (ANPM), ba Asuntu Explorasaun no Exploitasaun Minerál, José Gonçalves, hateten, parte autoridade hahú prepara elabora prosesu administrativa atu halo diseminasaun bainhira Lei Kódigu Mineiru ne’e entra ein vigór.

“Ami hahú elabora prosesu administrasaun no kriasaun regulamentu balun hodi fasilita implementasaun kódigu Mineiru tanba lejizlasaun ne’e iha espasu loron 180 molok entra ein vigór,” Vise-Prezidente ANPM ne’e informa iha ninia knaar fatin, edifísiu Ministériu Finansa (MF), Aitarak-laran, Dili, segunda ne’e.

Parlamentu Nasionál (PN) halo diskusaun no aprovasaun ba Projetu-lei nú 4/V (1a), Kódigu Mineiru, iha finál globál ho rezultadu votasaun a-favór 56, laiha kontra no abstensaun.

Notísia relevante: PN aprova projetu-lei kódigu mineiru ho unanimidade  

Ministériu Petróleu no Minerál (MPM) no ANPM hahú prepera ekipa atu halo diseminasaun Lei Kódigu Mineiru, bainhira lejizlasaun ne’e hetan ona promulgasaun.

“Ami esforsu hela kria administrasaun no regulamentu balun tanba ita iha esperansa boot katak kodígu bele fasilita di’ak liútan dezenvolvimentu rekursu mineiru iha terrítóriu nasionál ne’e,” nia akresenta.

Vise-Prezidente konsidera, Kodígu Mineiru bele fasilita autoridade reguladór atubele regula no kontrolu inklui fó lisensa ba empreza nasionál no internasionál ne’ebé iha interese atu investe iha setór minerál.

Nia garante, lejislasaun ne’e bele hatama reseita ba Estadu liuhosi dezenvolvimentu potensiál ba rekursu minerál, liuliu riku-soin sira iha rai maran.

Projetu-lei Kódigu Minieru iha artigu 162 ho kapítulu 20 no anexu tolu, ne’ebé iha artgiu ida define aprovasaun, artigu tuir mai deskreve polítika mineira, artigu seluk objetivu sira kona-ba estratejia setór mineiru no ikus liu artigu 162 define dispozisaun tranzitóriu.

Lei  ne’e sei vigora bainhira kompleta ona loron 180, ne’ebé públika hosi Jornál Repúblika.

Iha anexu I define klasifikasaun minerál kompostu hosi mineiru metáliku, jemas, mineiru radiuativu, rochas no minerál industriál, karvaun no mineiru de terras raras, anexu kona-ba taxa hosi royalty mineiru no anexu III define renda superfísie.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here