Administradór Munisípiu Manufahi, Arantes Isaac Sarmento. Imajen Tatoli/Dok

DILI, 05 jullu 2021 (TATOLI)-Administradór Munisípiu Manufahi, Arantes Isaac Sarmento, sesta (02/07), halo dialogu komunitária ho komunidade Aldeia Atuhei, Suku Rotuto, Postu Administrativu Same.

Diálogu komunitária ne’ebé  akompaña mós hosi Komandante Polísia Nasionál Timor-Leste (PNTL) Munisípiu Manufahi, ho objetivu atu rona preokupasaun komunidade nian, inklui introdús mós rezultadu servisu ne’ebé autoridade munisípiu atinje ona.

Administradór  Arantes Isaac Sarmento, segunda ne’e,  informa ba Agência Tatoli liuhosi telefónika, katak diálogu komunitária ne’e introdús mós planu no programa munisípiu nian ba tinan 2022, liuliu planu dezenvolvimentu  iha setor infraestrutura bázika, hanesan eletrisidade, estrada rurál, mão de obra, ho mós implementasaun harii uma ba kbiit-laek.

Iha diálogu komunitáriu ne’e, komunidade aprezenta preokupasaun boot, maka liga ba eletrisidade tanba dezde Timor-Leste hetan ninia independénsia to’o agora aldeia refere seidauk asesu ba liña eletrisidade, nune’e bee-moos, estrada, tanba iha aldeai refere iha fatin turizmu, maibé estrada ladi’ak no fasilidade saúde  la sufisiente, inklui fatin ba  doutór sira atu hela halo tratamentu ba komunidade laiha.

“Uma-kain ne’ebé iha Aldeia Atuhei, inklui Aldeia haat seluk iha Suku Rotuto hamutuk uma-kain 378 mak seidauk asesu liña eletrisidade,” Administradór Arantes Isaac Sarmento hateten.

Administradór rasik hateten katak iha infraestrutura nian liuliu liga ba eletrisidade  hosi Eletrisidade de Timor-Leste (EDTL.EP) prosesu konkursu públiku hotu ona ne’ebé tempu badak nia-laran komunidade refere sei asesu ba eletrisidade.

Kona-ba estrada, bee-moos, edukasaun, saúde agora daudaun Munisípiu elabora ona planu ba 2022 nian, tanba ne’e preokupasaun sira-ne’e sei tau konsiderasaun ba Orsamentu Jerál Estadu (OJE) 2022.

Iha diálogu ne’e, Komandante PNTL Munisípiu Manufahi ko’alia kona-ba seguransa nian ba komunidade no joven-sira, oinsá bele harii dame iha ida-idak nia bairru, aldeia, suku nune’e bele kontribui dame iha Munisípiu Manufahi.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here