Prezidente Partidu KUNTO, Armanda Berta dos Santos, asina Plaka Partidu KHUNTO iha Manleu, domingu (04/07). Imajen Tatoli/Francisco Sony.

DILI, 04 jullu 2021 (TATOLI)—Partidu Kmanek Haburas Unidade Nacional Timor Oan (KHUNTO) liderada Armanda Berta dos Santos no Konselleiru Másimu José dos Santos Bucar ‘Namori’ lori partidu refere envolve kaer ukun durante tinan tolu, nu’udar sasukat hodi kontinua eziste no hakat ba oin.

Notísia Relevante: Armanda Berta ofisialmente deklara kandidata an ba Prezidente Repúblika

“Ohin, KHUNTO selebra aniversáriu ba dala-X, ne’ebé hamriik iha istória foun ida iha nia dezenvovlimentu pilár importante Estadu nian. Partidu KHUNTO aprende lisaun foun no interesadu tebes iha tinan tolu envolve kaer ukun. Lisaun ida-ne’e mak sei sai nu’udar avaliasaun ba partidu KHUNTO hodi deside nia perfíl polítika, karáter polítika no vizaun polítika hodi bele la’o ba oin,” Prezidente Partidu KHUNTO, Armanda Berta dos Santos, ko’alia asuntu ne’e iha ámbitu selebrasaun aniversáriu KHUNTO ba dala-X, inaugurasaun sede nasionál iha Manleuana, domingu ne’e.

Nia hateten, partidu KHUNTO nu’udar partidu foun iha vida polítika liuhosi konjuntura forsa polítika iha órgaun lejizlativa no órgaun ezekutiva iha Estadu Direitu Demokrátiku ida-ne’e.

Ezisténsia partidu KHUNTO mai ho istória rasik ne’ebé kaer-metin ba prinsípiu fundamentál lei inan, nune’e partidu KHUNTO hamriik metin ho prinsípiu rasik katak kaer-metin ba valór komún hodi luta ba bein-estár povu Timor-Leste nian.

Partidu KHUNTO mós nu’udar forsa polítika ida-ne’ebé iha vontade no kapasidade atu serví povu no nasaun iha kontestu estadu direitu demokrátiku ida-ne’e tanba sempre respeita istória pasadu nu’udar prosesu istória iha prosesu demokrasia iha Timor-Leste.

Prezidente Partidu KHUNTO ne’e haktuir, laiha pasadu sein hamriik hosi istória pasadu ida, tanbe ne’e istória pasadu importante ba ezisténsia partidu refere kontinua hakat ba oin iha vida polítika.

“Ho esperiénsia pasadu ne’e mak ohin ita bele hamriik nu’udar Estadu ida. Karik laiha pasadu laiha preszente. Partidu KHUNTO ohin loron nu’udar reprezenta votu povu nian iha estrutura Parlamentu Nasionál nomós iha Governu tanba mai mós hosi esperiénsia pasadu ida. Ho esperiénsia pasadu ne’e, ohin KHUNTO halo tinan 10 hodi marka nia prezente, prezente ida-ne’ebé ho dignu, prezente kaer-metin prinsípiu hodi hateke ba futuru no hatene valoriza prinsípiu estadu nian, respeita valór demokrátiku no defende interese estadu no dignidade povu nian,” nia dehan.

Tanba ne’e, partidu KHUNTO kontinua esforsa hetan podér liuhosi eleisaun atubele serví no defende interese povu nian.

Atu atinje podér ba serví mak partidu polítika sira tenke serbisu maka’as apoia adekuadu liuhosi eleisaun no partidu polítiku sira hamriik metin ho prinsípiu rasik.

Papél importante hosi partidu polítiku mak tenke halo komunikasaun polítika tanba partidu polítiku nu’udar fonte atubele akomoda informasaun ka aspirasaun hosi povu nune’e transmite ba Governu.

Iha Biban hanesan, Konselleru másimu Partidu KHUNTO, José Dos Santos Naimori Bucar, hateten KHUNTO mós iha nia lema no prínsipiu ne’ebé hateten “Tane Ó Rai, Tane Ó Lisan, Fé no Esperansa no Karidade”.

“Partidu KHUNTO hakarak hametin unidade nasionál hodi kontribui ba prosesu dezenvovlimentu liuhosi tane no resepita partidu polítiku hotu ne’ebé ezjiste ona,” nia afirma.

Nune’e, Naimori Bucar kompromete atu hatutan mehi eroi no lutadór sira-nian hodi liberta povu hosi mukit.

“Ha’u husu ba kuadru politiku, militante no simpatizante sira atu fó onra ba eroi sira no lutadór sira-ne’ebé fó aan tomak ba luta ukun rasik aan no kontinua hatutan nia mehi hodi liberta povu no fó moris di’ak ba povu,” nia dehan.

KHUNTO ho esperansa tomak, durante tinan 10 ne’e katak sei kontribui ba prosesu dezenvovlimentu nasionál liuhosi hametin unidade nasionál.

Entretantu, Prezidente Komisaun Nasionál Eleisaun (CNE), Alcino de Araújo Barris, fó parabéns ba Partidu KHUNTO ba nia aniversáriu dala-X ho esperansa tomak atu kontinua partisipa prosesu demokratizasaun.

“Ha’u lori CNE kongratula partidu KHUNTO no espera kontinua susesu iha prosesu demokratizasaun hodi hatuur Estadu no kontribui ba prosesu dezenvovlimentu nasionál,” Prezidente CNE kongratula.

Tuir observasaun Agência TATOLI iha terrenu hatudu katak, Prezidente Parlamentu Nasionál, Deputadu Aniceto Longuinhos Guterres Lopes, mak ko’a-fita hodi inaugura sede nasionál Partidu KHUNTO nian.

Nune’e mós plaka sede foun ne’e asina hosi Prezidente Partidu KHUNTO Armanda Berta dos Santos no Prezidente Komisaun Nasionál Eleisaun (CNE-sigla portugés) Alcino de Araújo Baris no akompaña hosi estrutura no militante partidu KHUNTO kuaze rihun-lima.

Partisipa iha aniversáriu no inaugurasaun ne’e, Primeiru Ministru Taur Matan Ruak, Prezidente Parlamentu Nasionál Aniceto Longuinhos Guterres Lopes, Prezidente CNE Alcino de Araújo Barris, korpu diplomatiku sira, kuadru partidu politiku hosi partidu ne’ebé hetan asentu iha Parlamentu Nasionál no militante sira.

Jornalista : Florencio Miranda Ximenes

Editór       : Cancio Ximenes

HAKEREK NO HATÁN

Please enter your comment!
Please enter your name here