Diretòr Centro Comunidade Covalima (CCC), Alberto de Jesus Barros. Imajen Tatoli/Celestina Teles

COVALIMA, 04 jullu 2021 (TATOLI)—Centro Comunidade Covalima (CCC) sei distribui nesesidade bázika ba família vulneravel hamutuk 215 iha postu administrativu tolu iha Covalima. 

Notísia Relevante: CCC sei apoiu nesesidade bázika ba família vulneravel 25 iha Taroman

“Ami sei distribui aí-han ba família vulneravel iha postu administrativu Fatululik iha suku Taroman família vulneravel hamutuk 25 no suku Fatululik família vulneravel hamutuk 15, iha postu administrativu Tilomar hamutuk 115 no iha postu administrativu Fatumea família vulneravel hamutuk 60,” Diretòr Centro Comunidade Covalima (CCC), Alberto de Jesus Barros, hateten ba Agência Tatoli, liuhosi telefónika, domingu ne’e. 

Apoiu ne’e sei distribui iha fulan-setembru no fulan-outubru nia laran, ho razaun tanba haree ba kondisaun estrada ne’ebè la favoravel (aat).

Centro Comunidade Covalima (CCC) distribui nesesidade bázika hanesan foos, Supermie,  mina tein Bimoli no máskara ne’ebè sei gasta orsamentu hamutuk $18,995. 

Xefe Suku Taroman, postu administrativu Fatululik, Leonel Asa, hateten suku Taroman identifika ona família vulneravel hamutuk 25 ne’ebé sei hetan apoia hosi Centro Comunidade Covalima. 

“Ami rekolla dadus família sira-ne’ebè vulneravel kada aldeia ida, ami identifika uma kain lima (5) atu hetan apoiu nesesidade bázika hosi Centro Comunidade Covalima,” Leonel dehan. 

Centro Comunidade Covalima iha inisiativa rasik hodi fó apoiu nesesidade bázika ba família vulneravel sira iha postu administrativu tolu refere.

Jornalista : Celestina Teles

Editór       : Cancio Ximenes 

HAKEREK NO HATÁN

Please enter your comment!
Please enter your name here