Komemorasaun loron internasionál kooperativa, iha salaun Rudál Osindo, sábadu (03/07/21). Imajen facebook.

DILI, 03 jullu 2021 (TATOLI)—Ministru Koordenadór Asuntu Ekonómiku (MKAE), Joaquim Amaral, konsidera formasaun kontínua ba kooperativa-sira iha territóriu tomak importante, atu bele hametin liu tán sósiu ekonomia iha rai laran.

Joaquim Amaral konsidera importante tanba, bainhira iha situasaun difísil, setór kooperativa liu hosi Sekretáriu Estadu Kooperativa (SEKOP), buka dalan oioin atu bele ajuda kooperativa-sira iha TL liuhosi parseiru-sira hanesan Universidade Nasionál Timor-Lorosa’e (UNTL), hodi harii Departementu Jestaun Kooperativa.

Notísia relevante:SEKoop fasilita formasaun kooperativa ba juventude na’in-200

“Entaun, ida-ne’e fó énfaze katak kooperativa edukasaun, inovasaun, formasaun sira-ne’e importante tebes ba kooperativista-sira atu evakua sira nia-an  ajusta sira nia-an ho realidade foun ne’ebé tama iha era dizitalizasaun,” Joaquim Amaral, hateten ba jornalista-sira hafoin serimónia komemorasaun loron internasionál kooperativa, iha salaun Rudal, Osindo Ai-mutin, sábadu ne’e.

Iha mensajen, MKAE mós enkoraza SEKOP atu kontinua  atu serbisu ho kooperativista-sira atu hametin liu tán setór produtivu iha área rurál oras-ne’e situasaun difisil, setór ekonomia liuliu ekonomia kiik no médiu-sira afetadu tebes, nune’e atu rekopera presizu meiu ho kondisaun no apoiu hosi parseiru-sira.

Iha fatin hanesan, Sekretáriu Estadu Kooperativa, Elizário Ferreira, motiva dirijente kooperativa-sira atu serbisu  hodi fó orientasaun ba dezenvolvimentu iha nível lokál nune’e kombate ki’ak iha rai laran.

“Tema ne’ebé ami foti iha tinan 2022 to’o 2023  maka hamutuk luta hasoru ki’ak.  Entaun, hamutuk hodi kontra ki’ak iha ita-nia rain, tanba ne’e dirijente kooperativa serbisu atu fó orientasaun ba dezenvolvimentu  iha nível lokál no mós  interese ba vida komunidade, liuliu vida ekonómiku,  finanseira no sosiál iha sosiedade,” Elizário Ferreira hateten.

Oras-ne’e daudaun, funsionáriu hosi SEKOP iha munisípiu 12 inklui RAEOA hamutuk 170, kompostu hosi na’in-hitu iha munisípiu Dili no restante iha munisípiu sira-seluk.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here