Matebian, Miguel Maia. Imajen/Média UNTL.

DILI, 03 jullu 2021 (TATOLI)—Eis Pró-Reitór Asuntu Akadémiku, Universidade Nasionál Timor-Lororsa’e (UNTL), no atuál dosente Fakuldade Edukasaun Arte Humana (FEAH), Miguel Maia, hakotu-iis iha Ospitál Nasionál Guido Valadres (HNGV sígla portugés) tanba sofre estómagu.

”Durante ne’e nia moras estómagu. Tanba ne’e mak nia dieta no halo tratamentu iha klínika privadu Kura Ha’u no nia forsa komesa tun ba beibeik. Família mak obriga hodi lori nia mai halo tratamentu iha HNGV iha 25 juñu,” Família Matebian, Padre Evaristo Fernandes da Costa Soares, hateten ba jornalista-sira iha mortuáriu HNGV, sábadu ne’e.

Notísia relevante:Ema deskoñesidu baku Custódio, mate iha HNGV

Buat ne’ebé família rona hosi médiku hafoin halo konsulta, katak, matebian mós la’ós de’it sofra moras estómagu, maibé iha mós moras komplikasaun seluk ne’ebé halo nia tenke hakotu-iis iha tuku 07:45 otl.

Tuir Padre Evaristo da Costa katak, matebian durante ne’e moras duni estómagu tanba serbisu barak no ladún han, ne’ebé afeta maka’as mós ba tensaun alta, halo nia forsa laiha, to’o hakotu-iis.

Iha fatin hanesan, Reitór UNTL, João Martins, sente lakon edukadór di’ak ida ne’ebé durante ne’e hala’o serbisu iha UNTL nunka kolén no dedikadu tebes.

”Kualkér tarrefa serbisu ne’ebé fó ba nia nunka rejeita maski nia situasaun ladún di’ak, maibé nunka hatan dehan kolen, ida ne’e mak UNTL sente lakon,” João Martins, hateten.

Atuál reitór ne’e konta-tuir katak, desde sei tempu Universitas Timor-Timur (UNTIM) matebian serbisu ona, no bainhira nakfilak ba UNTL to’o ohin loron,  assume mós kargu importante hanesan Dekanu Fakuldade Edukasaun, no Vise-Reitór Asuntu Akadémiku, ikus liu mak nia asume kargu hanesan pro-Reitór Asuntu Akadémiku.

To’o oras ne’e seidauk iha desizaun kona-bá fatin deskansa ikus nian, maibé tuir planu, família sei lori mate-isin tau iha rezidénsia Vila-Verde, Dili.

Miguel Maia moris iha 06 juñu 1960, hosi munisípiu Bobonaro no husik-hela kaben ho oan na’in-ida.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here