Kondisaun atuál iha suku Lour, postu administrativu Bobonaro, munisípiu Bobonaro. Imajen Tatoli/ Sérgio da Cruz.

BOBONARO, 03 jullu 2021 (TATOLI)—Populasaun aldeia tolu iha suku Lour, postu administrativu Bobonaro, munisípiu Bobonaro, seidauk asesu ba eletrisidade no bee moos.

Xefe suku Lour, Miguel Lopes Gomes, hateten aldeia tolu ne’ebé seidauk asesu eletrisidade no bee moos  mak hanesan, aldeia Heliquei, Galita no Olo-olo.

Notísia relevante:Vítima dezastre naturál 115 iha Bobonaro simu materiál konstrusaun

“Suku ne’e  iha aldeia ida de’it mak asesu eletrisidade no aldeia tolu seluk to’o agora seidauk asesu. Situasaun ne’e halo autoridade lokál preokupa tebes, nune’e husu Governu atu konsidera,” Miguel Lopes Gomes  hateten ba jornalista Agência Tatoli, via telefónika, sábadu ne’e.

Kona-bá bee-moos, durante ne’e komunidade kuru iha bee matan ida de’it no balun ne’ebé hela dook obrigatóriu tenke ba kuru iha mota, kuaze kilometru tolu.

Líder komunitáriu ne’e hato’o ona ba Governu liuliu Ministériu Obra Públika (MOP), maibé to’o agora seidauk iha resposta pozitivu no atualmente populasaun iha aldeia tolu ne’e uza de’it Solar Panel.

Populasaun Andre de Jesus da Costa, konsidera situasaun ne’e fó impaktu makaas ba estudante-sira labele estuda iha tempu kalan.

“Problema eletrisidade difikulta tebes ami nia-oan sira atu estuda iha tempu kalan,” nia hateten.

Suku Lour, aldeia Heliquei no Galita mak iha poténsia ba Gás, no iha setór agrikultura komunidade  kuda kuda batar, fehuk, liis, lakeru, hudi, ai-farina no ai-han sira seluk tan.

Suku ne’e mós iha poténsia ba área truizmu tanba iha foho ida naran Gunung Meza,ne’ebé uluk  funu 1999 sai mós fatin konsentrasaun polulasaun postu administrativu Bobonaro no Zumalai hodi helik an hosi inimigu.

Suku Lour iha alde haat mak hanesan Heliquei ho-nia na’in 358, Ol-olo 347, Galita 209 no aldeia Tasgolo 478, ho  totál 1.392 mai hosi xefe família 308.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here