Hakerek nain, Miguel Gonçalves.

Hosi:

Miguel Gonçalves

 

Ohin loron, ema sempre iha nesesidade ba saida mak dezeja, tanba baze ba liberdade ne’ebé iha. Goza ho liberdade ne’e, no buka liuhusi meiu oioin atu prienxe buat ruma ne’ebé atu pertensa ba moris ema ida no barak liután, tantu iha família no sosiedade. Moris iha sékulu 21 ne’e, domina no infiltra iha atividade loroloron nian ho teknolojia komunikasaun ne’ebé avansadu, kompetitivu no dinámika tebes.

Nune’e, ho avansu ne’e mídia nia papel importantísima iha aspetu hotu dezenvolveimentu nasaun ida nian, liuliu iha país post-dezenvolvimentu sira no refleta ba Timor-Leste. Maski ho prezensa ne’e, tantu ho dezafiu no oportunidade liuhusi dezenvolvimentu mídia. Mídia tuir Adrianto, define mídia imprensa; jornál no revista, mídia eletrónika mak rádiu, televizaun, no mídia foun mak internét ka online New mídia, (Adrianto, 2018: 40).

Haree husi pontu ne’ebé krusiál, daudaun ne’e maka  mídia sosiál sai dezafiu ba mídia konvensionál sira tanba ho posting lais tebes sein fonte kredível. Atu pasa iha dezafiu ne’e maka mídia mós aleinde halo tranzmisaun ho kanál ezistente sira, iha mós website no pájina própria Facebook.

Realidade ho proximidade ne’ebé forte, iha Timor-Leste kanál sira antes ne’e konvensionál hahú adota ona ho sistema dijitál ezemplu Rádiu Televizaun Timor-Leste (RTTL,ep), aleinde halo tranzmisaun konvensionál, iha tan website, facebook iha mós youtube. La’ós kanál públika ne’e de’it, hanesan mós ho GMNTV, Diáriu Timor Post, Diáriu Independente, Rádiu Timor Kmanek inklui kanál sira seluk ne’ebé la mesiona iha artigu ne’e. Tuir relatóriu Conselho de Imprensa nian, publika iha 2017, katak eziste ona kanál hamutuk 50+ Mídia tranzmisaun 29, mídia imprime 10, no kanál online 6, (CI, 2017: 26).

Relasiona ho dezafiu sira, bele konsidera hanesan oportunidade ba meiu konvensionál sira atu dezenvolve an ho krítiku liután, iha sentidu funsionamentu redasaun mídia nian liuhusi ajenda-mídia nian.

Antes atu diskute kona-ba ajenda-mídia no ajenda-polítiku, teorikamente hahú husi Teoria Ajenda-Setting. Maxwell McCombs no Donald Shaw jornalista seniór Washintong Post mak dahuluk deskobre termu “Ajenda-Setting” iha 1972 liuhusi sira-nia reportajen klean kona-ba kazu ne’ebé koñesidu iha momentu ne’ebá hanaran Scandal of Watergate (Morissan, 2010, 88). Ahh! Leitór sira, rona, lee, no hatene karik lala’ok saida mak Ajenda-Setting?. Maibé, di’ak liu kontinua lee to’o hotu.

Tuir Bernard Cohen katak “The mass mídia may not successful in telling us what to think, but they are stunningly successful in telling us what to think about”, mídia dalaruma la susesu bainhira hato’o ba ita saida mak atu hanoin, maibé konsege tranzmite asuntu ne’ebé halo audiénsia tenke hanoin (Cohen, 1963: 16). Alende ne’e, Rogers mós define Ajenda-Setting hanesan kompetisaun kontínua kona-ba asuntu importante oioin ne’ebé hahú no hetan atensaun husi profisionál mídia, públiku no ukun na’in sira hanesan prosesu linear ne’ebé konstitui husi faze tolu; (1) kolokasaun ajenda mídia define prioridade husi mídia rasik, (2) ajenda mídia influénsia saida mak públiku hanoin (Public agenda), (3) ajenda públika iha interasaun ho saida mak desizór polítiku foti no ikus rezulta ajenda polítika, (Dearing, 1988: 95).

Bazeia ba definisaun rua iha parágrafu anteriór fó espasu no oportunidade ba profisionál mídia sira bele dinamiza, krítiku no preparadu ho sira-nia ajenda tantu diáriu, semanál no bisemanál ka mensál. Ajenda iha aspetu ne’e, hanaran ajenda-mídia, ne’ebé ezekuta iha reuniaun editoriál (Editorial meeting).

Normalmente, iha funsionamentu “editorial meeting” kada loron iha parte dader antes ba iha terrenu, ne’e kabe ba dinámika no krítiku mídia nian bele trasa ajenda mídia ne’ebé efetivu. Agora ajenda mídia loloos ne’e mak kada loron ka semana tuir oras determinada jornalista sira, no xefe redasaun mak lidera sesaun ida ne’e, jornalista sira aprezenta asuntu kobertura, diskute bazeia ba informasaun inisiál, iha asuntu balun follow up, balun foun no seidauk iha kobertura husi mídia seluk tanba mídia mós iha asuntu balun pur-konvite, no asuntu husi jornalista rasik ka indika husi redasaun no aprova i kobertura iha terrenu hanaran “planningsheet”.

Ideia prinsipál husi Teoria Agenda Setting ne’e, katak mídia fó atensaun ne’ebé ho ángulu diferente ba asuntu ka akontesimentu sira iha sosiedade. Nune’e, saida mak mídia konsidera importante, importante mós  ba audiénsia. Iha artigu ne’e, sei foku ba importánsia ajenda mídia nian inflénsia ba mudansa ajenda polítika nian (Nasionalita, 2015:2).

Jornalista, editór no xefe redasaun hanesan profisaun profisionál ne’ebé marka diferensa iha profisaun seluk nia leet, hanesan doutór, profesór, mekániku, agrikultór no seluk tan. Funsaun xefe redasaun nian mak deside no kontrola asuntu kobertura jornalista nian, verifika rezultadu kobertura bazeia ba ángulu no aprova publikasaun sira iha mídia, tantu diáriu, semanál, no bisemanál (Ningrat, 2015:73). Jornalista ida krítiku, vontade, no modelu obra ne’ebé aprezenta tanba ne’e komunidade konsidera profisionál. Ezemplu iha akontesimentu ida ema sempre hein saida mak mídia atu publika.

Iha asuntu seluk ne’ebé ema la konsege haree hetan, la konsege to’o, públiku haluhan,  la importante, maibé ho poder redasaun nian bele muda ema nia hanoin kona-ba situasaun ne’e. Pasu inisiál ida mak rigorozu iha redasaun, no jornalista idaidak. Tanba dinámika koko atu kompete ho mídia seluk, krítiku atu indika diferensa liuhusi publikasaun sira.

Eventu lansamentu obra ida, mídia hotu naturalmente iha ona ángulu rasik kona-ba asuntu ne’e, no iha eventu ne’e mak fatin ne’ebé jornalista ho fonte ne’ebé iha pozisaun importante (Prezidente Repúblika, Primeiru-Ministru, Ministru, Sekretáriu Estadu, Diretór, Emprezáriu benefísiáriu komunidade no seluk tan) sira hasoru malu refleta ba dezeñu husi ángulu. Nune’e, publikasaun kona-ba akontesimentu refere la sees husi mídia seluk, agora iha ne’e, saida mak presiza. Ajenda mídia nian importante hodi kruza.

Tuir McCombs katak iha mídia planea no aprova angúlu ba kobertura asuntu ne’ebé ho valór boot iha posibilidade no influénsia ajenda públiku, maibé bazeia mós ba kapasidade entendimentu no interpretasaun husi audiénsia (Bahfiarti, 2012: 75).

Ezemplu: (1) Banku Federál rejeita 3x levantamentu Fundu-Petrolíferu, publika husi Dili Post, 3 marsu 2021, (2) Publikasaun Naunil.com, iha 15 no 21 marsu kona-ba “estudante halerik ba hamlaha, selu kos, pulsa ba aula”, (3), Livestreaming husi televizaun, youtuber, no facebooker sira kona-ba disputa mate isin matebian sr. Armindo Borges ne’ebé envolve líder karismátiku Xanana Gusmão, (4) Peñor oan selu kos, publika husi GMNTV no mídia seluk.

Haree ba asuntu haat ne’e, hanesan ezemplu balun de’it atu refleta hanoin ruma iha artigu ne’e, no hetan mós atensaun husi mídia, sosiedade. Tanba hafoin publikasaun ba asuntu hirak ne’e, konvense konsientemente atensaun públiku nian, no ajenda polítiku nian, Konsellu-Ministru aprova rezolusaun ba apoiu estudante alojamentu iha Díli, no muda modelu ba haloot mate-isin ho Covid-19, BCTL halo komunikadu ida ba publikasaun Díli Post nian, debate iha Plenária Parlamentu Nasionál kona-ba peñor oan. Maibé atu espesífiku tenke iha publikasaun ne’ebé dadus empírika seluk ida.

Konsiderasaun! iha mídia idaidak mosu dezafiu hanesan kompetisaun mídia ida ho mídia seluk, prezensa mídia sosiál ne’ebé atualiza informasaun dalaruma sein faktu, no dezafiu ida mak limitasaun rekursu mídia nian. Maibé nafatin ezerse papel ba liberdade, independénsia no dinámika tuir saida mak ohin loron sosiedade presiza, liuliu nesesidade informativu nian.

Liuhusi artigu ne’e, rekomenda katak (1) kontinua uza poder independénsia mídia nian hodi matan, tilun, no ibun ba sosiedade, (2) jornalista sira foku iha beat ho formasaun kontinua ba área ne’e, (3) minimiza atividade eventuál sira ho konsentra barak ba ajenda própria. @Obrigadu.

Hakerek nain nu’udar Dosente Integrál, Departamentu Komunikasaun, FCS-UNTL

Email: miguel.gonçalves434@gmail.com

Referénsia

Adrianto, Elvinaro (2007), Komunikasi Massa, Suatu Pengantar, Simbiosa Rektama Mídia, Bandung.

Brosius & Kepplinger (1990) The Agenda Setting Function of television News, Communication Research 17

Bahfiarti, Tuti (2012), Buku Ajar Dasar-dasar Komunikasi, UNHAS, Makasar.

Conselho de Imprensa (2017), Relatóriu Anuál 2016, Díli.

Bernard C. Cohen (1963), The press and policy, Princeton University, America.

McQuail, Denis (2011), Teori Komunikasi Massa, Jakarta, Selemba Humanika

Morissan (2013), Teori Komunikasi Massa, penerbit Ghalia, Indonesia.

Nasionalita, Kharisma (2015), Relevansi teori agenda setting Dalam dunia tanpa batas, JL, Sultan Agung, Semarag

Ningrat ,H. Kusuma (2012), Jusnalistik teori dan praktis, PR. Remaja Rosda Karya Offset, Bandung.

Romli, A. Syamsul (2000), Jurnalistik praktis, PT. Remaja Rosdakarya, Bandung.

HAKEREK NO HATÁN

Please enter your comment!
Please enter your name here