TDD. Imajen Tatoli /Dok

DILI, 02 jullu 2021 (TATOLI)—Tribunál Distritál Dili (TDD), liuhosi primeiru interrogatóriu, aplika medida prizaun preventiva ba arguidu ADJ, tanba deskonfia envolve iha grupu na’ok teen rona malu (nakroma) ne’ebé na’ok ema nia-motór.

Arguidu hetan mandatu detensaun hodi kumpre oras 72 iha sela polísia atu submete ba primeiru interrogatóriu.

Notísia relevante:PNTL kontinua identifika rede ‘nakroma’ iha munisípiu haat

Iha indísiu katak, arguidu nu’udár kontudór lori nia-taxi iha ligasaun hodi tula membru nakroma na’in-ha’at ne’ebé daudaun-ne’e kumpre ona prizaun preventiva, hodi na’ok ema nia-motór iha Dili laran no munisípiu ne’ebé organizadu.

Alende ne’e, iha prova deskonfia grupu ne’e foti objetu motór balun no polísia identifika hodi halo apreensaun no vítima balun mós halo reklamasaun.

Tanba ne’e, Tribunál aplika medida prizaun preventiva ba arguidu iha inidísiu forte envolve iha kazu ne’e, hodi fasilita liu-tán Ministériu Públiku (MP), atu halo investigasaun no rekolla prova.

Defeza, Fernando da Costa, hateten iha prosesu inkéritu, MP promove ho krime furtu agravadu.

Tuir nia, desizaun ne’ebé Tribunál aplika, la adekuadu ho razaun tanba mandadu ne’ebé hasai la tuir prosedimentu legál no la prienxe rekezitu iha artigu 183 hosi kódigu prosesu penál, tanba ne’e sei halo rekursu.

Audiénsia ne’e prezide hosi Juiz Maria Solana, Ministériu Públiku reprezenta Prokuradór, Jacinto Babo, no arguidu hetan asisténsia legál hosi advogadu privadu, Fernando da Costa.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here