Edifisiu STAE Maliana. Imajen Tatoli/Sérgio da Cruz.

BOBONARO, 02 jullu 2021 (TATOLI)—Sekretariadu Tékniku Administrasaun Eleitorál (STAE), hala’o lansamentu ba Resensiamentu Eleitorál no Atualizasaun Baze Dadus (REABD), atu prepara ba eleisaun Prezidensiál tinan 2022.

“Ho lansamentu REABD ne’e, atu komunidade bele hatene informasaun kle’an liu tan kona-bá preparasaun eleisaun Prezidensiál 2022. Hahú ohin, STAE hanesan servidór hahú halo atendimentu iha postu administrativu neen iha munisípiu Bobonaro,” Diretór Jerál STAE, Acilino Manuel Branco, hateten ba jornalista-sira, hafoin lansamentu REABD, iha edifísiu STAE Bobonaro, kinta ne’e.

Notísia relevante:STAE-CNE lansa resensiamentu eleitorál ba preparasaun eleisaun prezidensiál 2022

Diretór ne’e hatutan, atividade ne’e atu la’o diak liu tán presija apoiu hosi entidade hotu-hotu hodi fahe informasaun ba komunidade, katak preparasaun ba eleisaun órgaun eleitorál prontu ona atu ezekuta.

Alende ne’e, husu mós ba Partidu Polítiku-sira atu halo fiskalizasaun ba atividade resensiamentu eleitorál no atualizasaun baze de dadus tuir lei resensiamentu eleitorál númeru 6/2016 ne’ebé hateten katak, iha aktus tomak resensiamentu ne’e, tenke hetan fiskalizasaun hosi líder partidu polítiku-sira.

Iha fatin hanesan, Administradór postu administrativu Maliana, Anibal Ferreira husu autoridade lokál-sira atu identifika identidade atuál, nune’e komunidade labele muda eleitorál tuir sira-nia hakarak.

“Ita la taka dalan ba komunidade tomak, maibé presija haree mós sira-nia identidade uluk hili tiha ona, dalaruma ita-nia komunidade ne’e hili tuir de’it sira-nia gostu. Dalaruma hela iha fatin ida, tanba baruk atu ba, naran muda eleitorál arbiru. Ida-ne’e labele naran fó deklarasaun ba sira,” nia sujere.

Hahú hosi janeiru to’o juñu 2021, STAE Bobonaro rejista eleitór foun hamutuk 600-resin, alende ne’e STAE mós iha ona aumentu rekursu umanu ne’ebé fó apoiu ba atividade resensiamentu eleitorál.

Tuir planu, eleisaun Prezidensiál 2022 STAE Bobonaro sei estabelese sentru votasaun hamutuk 130 no estasaun votasaun 150, iha munisípiu ne’e.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here