DILI, 02 jullu 2021 (TATOLI)—Diretór Jerál Peska hosi Ministériu Agrikultura no Peska (MAP), Acacio Guterres, informa, daudaun ne’e sentru produsaun iha munisípiu lima mak hakiak ikan.
“Produsaun ikan iha sentru viveiru lima kada tinan bele prodús ikan to’o millaun ida no ikan sira ne’ebé prodús maioria ho tipu tilapia no ikan mas,” Diretór Jerál Peska informa ba Agência TATOLI, via telefónika, sesta ne’e.
Governu Nova Zelándia mak apoia sentru produsaun ho fini ikan Monosex, nune’e bele prodús barak.
“Ita iha sentru produsaun hanesan kolam ikan boot ne’ebé estabelese iha munisípiu lima hanesan Gleno, Same, Maubisse ida iha Vemasse no Maubara,” nia akresenta.
Parte MAP mós nota katak daudaun ne’e abitante barak mak hahú tau interese hakiak ikan.
“Ita-nia komunidade sira daudaun ne’e barak maka hakarak hakiak ikan, maibé sira preokupa ba presu ne’ebé tun-sa’e, tanba ne’e ami sei haree mekanizmu nune’e komunidade ka peskadór bainhira hakiak ikan no kolleta bele hatene ona nesesidade no kondisaun merkadu,” nia dehan.
Jornalista : Natalino Costa
Editora : Julia Chatarina
