Koordenadór Sentru Treinamentu Knua Buka Hatene (KBH), Almeiro Lote dos Reis. Imajen Tatoli/Nelia Fernandes.

DILI, 02 jullu 2021 (TATOLI)—Koordenadór Sentru Treinamentu Knua Buka Hatene (KBH), Almeiro Lote dos Reis, hateten nia parte sei haruka karta ba Ministériu Saúde (MS) hodi rega aimoruk dezinfetante ba fatin formasaun, atu nune’e bele reativa filafali formasaun.

“Planu reativa formasaun iha fulan jullu nia laran, maibé ami sei haree filafali aminia formadór no formandu sira ne’e simu hotu ona vasina kompletu ka lae. Depois, ami mós sei halo karta ida ba Ministériu Saúde atu mai dezinfeta tiha aminia fatin formasaun ne’e, ho nune’e bele hahú filafali formasaun,” Almeiro Lote dos Reis hateten ba Agência Tatoli, iha nia knaar fatin Mandarin, Dili, sesta ne’e.

Objetivu hosi dezinfeta fatin ne’e hanesan kontribuisaun ida pa programa nasionál atu kombate COVID-19 iha Timor-Leste, no liuhosi asaun konkreta ne’e bele salva formandu 300-resin ne’ebé antes ne’e tuir formasaun iha sentru Formasaun Knua Buka Hatene.

Iha tinan 2021, tuir nia, Sentru Formasaun Knua Buka Hatene (KBH) hahú hala’o formasaun iha fulan janeiru maibé to’o fulan marsu atividade paradu tiha tanbá Governu implementa serka sanitária no konfinamentu obrigatóriu.

Formandu ne’ebé tuir formasaun iha KBH hahú hosi 2020 to’o 2021 hamutuk 800-resin, kompostu hosi labarik, juventude en jerál, dezempregu no universitáriu sira.

“Hosi formandu 800-resin ne’e, iha 10% mak hetan ona servisu hanesan balun servisu iha Korea, Inglatera no balun halo negósiu rasik,” nia dehan.

Formandu sira barak mak bele hetan servisu tanba iha sentru formasaun KBH ne’e, formandu sira aprende lian Inglés, Português, Korea, Komputadór, Administrasaun no Finansa, Planu Negósiu, Akuntabilidade, Lideransa, Rede, Hospitalidade no Jornalista Báziku.

Knua Buka Hatene (KBH), estabelese iha tinan 2001, iha fulan Setembru, ne’ebé forma hosi Konsorsium Organizasaun tolu (3), hanesan Institute Edukasaun Popular (SAHE/IEP), Labor Advocacy Intitute of East Timor (LAIFET), Grupu Feto Foin Sa’e TimorLorosa’e (GFFTL), no Apheha TimorLeste konsidera hanesan Konseleru.

KBH harii ho objetivu atu atu hasa’e kapasidade komunidade no foinsa’e sira liuhosi edukasaun no treinamentu ne’ebé partisipatóriu atu nune’e sira bele independente.

Iha 2001 ne’e, KBH eziste kedas ho ninia progama tolu hanesan ba programa Community Learning Center (CLC) atu dezemvolve komunidade ne’ebé mak sustentável liuhosi fó kapasitasaun ba juventude sira.

Programa daruak mak Expressionál Arts Program (EAP) ne’ebé atu dezemvolve komunidade liuhosi kapasitasaun iha área edukasaun populár iha área sira hanesan teatru, múzika (keyboard, piano, guitar), programa talk show iha rádiu, dokumentasaun filme no pinta.

Programa ikus liu mak programa Vocationál Training (VT) ne’ebé ho objetivu atu fó kapasitasaun ba komunidade iha área karpintaria, adubu organiku, no kursu hospitality.

Hafoin ne’e, iha 2020, KBH aumenta tan área formasaun sira hanesan lian Inglés, Portugés, Korea, Komputadór, Administrasaun no Finansa, Planu Negósiu, Akuntabilidade, Lideransa, Rede, Hospitalidade, Keyboard, no Jornalista Báziku.

Totál formadór iha Knua Buka Hatene hamutuk 22 no hosi númeru ne’e kompostu hosi feto na’in-neen (6) no mane na’in-16, no formadór sira-ne’e mesak lisensiatura ne’ebé maihosi universidade sira iha Díli laran.

Jornalista : Nelia Fernandes

Editór       : Cansio Ximenes

HAKEREK NO HATÁN

Please enter your comment!
Please enter your name here