PAM Bobonaro foun, Ernesto de Oliveira da Silva, hala’o juramentu ba mandatu tinan lima iha salaun Administrasaun Munisipál, Holsa Maliana, sesta (02/07/21). Imajen/Média MAE.

BOBONARO, 02 jullu 2021 (TATOLI)—Prezidente Parlamentu Nasionál (PPN), Aniceto  Guteres, husu Prezidente Autoridade Munisipál (PAM) Bobonaro foun, Ernesto de Oliviera Bareto, atu ukun ho responsabilidade nakonu ho sentidu Estadu, labele haree ba kór polítika.

“Kargu ne’e nu’udár instrumentu ba ukun no la’ós ida-ne’e mak sai ita nia objetivu, maibé ukun ne’e tenke ho responsabilidade nakonu ho sentidu Estadu. Bainhira Prezidente foun atu hala’o kna’ar tenke rai farda partidu-nian atu haku’ak ema hotu-hotu iha Bobonaro,” Aniceto Guteres, hateten durante serimónia pose ba PAM Bobonaro foun, iha edifísiu Administrasaun munisipál Bobonaro, Holsa Maliana, sesta ne’e.

Notísia relevante:Populasaun Bobonaro 15.834 asesu ona eletrisidade

Prezidente PN mós husu ba PAM Bobonaro foun buka identifika poténsia rekursu hotu-hotu ne’ebé munisípiu ne’e iha, nune’e bele dezenvolve diak liu tán, hodi responde nesesidade komunidade.

Aniceto Guteres husu ba populasaun Bobonaro atu serbisu hamutuk hodi kontribui tuir kapasidade ida-dak nian, nune’e lori dezenvolvimentu la’o di’ak liu tán iha munisípiu ne’e.

“Ha’u iha mehi ida, to’o loron ida bainhira ita serbisu hamutuk, hotu-hotu kontribui tuir ninia kapasidade, loro-matan sei mosu iha Bobonaro leno ba Timor-Leste tomak,” nia subliña.

Nia rekoñese katak, munisípiu ne’e sira sei enfrenta problema barak, liuliu infraestrutura bázika, bee moos, eletrisidade no seluk tan, tanba ne’e Aniceto enkoraza PAM foun atu harii asossiasaun komunidade Bobonaro hodi tau hanoin hamutuk ba mudansa.

Alende ne’e, fó-hanoin ba autoridade munisipál foun koopera ho seguransa no líder komunitária-sira, atu halo kontrolu másimua ba komunidade ne’ebé hela besik iha fronteira labele tama-sai, tanba COVID-19 ho variante foun naran Delta ne’ebé perigu liu tan, ninia kapasidade kontájiu no propagasaun lais liu.

MAE husu implementa programa Governu to’o baze

Ministru Administrasaun Estatál (MAE), Miguel Perreira de Carvalho, husu no dezafia PAM foun Bobonaro atu konsidera obstákulu ne’ebé povu enfrenta iha baze sai hanesan dezafiu kolektivu ida, nune’e bele implementa diak liu tán programa Governu iha iha baze ho susesu.

“Obstakulu hirak ne’ebé populasaun hasoru, hanesan mós obstakulu ne’ebé impede dezenvolvimentu lokál, maibé ita tenke fuan boot hodi hatuur estratejia no implementasaun programa Governu iha baze ho susesu tuir saida mak povu presija,” Miguel Perreira de Carvalho hateten iha diskursu.

Tanba ne’e, Governante ne’e husu atu Autoridade foun tenke promove insentiva partisipasaun sívika konstrutiva durante mandatu, tanba hosi ne’e mak bele hetan esénsia loloos hosi podér lokál.

Nia dehan, nu’udár reprezentante Governu iha nível lokál, Autoridade munisípiu tenke haraik-an hodi bele sai instrumentu Estadu, atu halibur sidadaun hotu, iha elaborasaun planu dezenbolvimentu.

“Tenki halo esforsu hodi garante katak, alunu-sira Bobonaru iha kondisaun mínimu hodi tuir prosesu aprendizazen ho di’ak, populasaun bele hetan atendimentu saúde di’ak, infraestrutura rurál ne’ebé adekuadu,” nia husu.

PAM sei konsentra liu ba infraestrutura bázika

PAM Bobonaro, Ernesto de Oliveira da Silva hateten, durante mandatu tinan lima, dahuluk sei konsentra liu ba dezenbolvimentu insfraestrutura bázika iha postu administrativu neen iha munisípiu ne’e.

“Primeiru infraestrutura bázika, atu nune’e komunidade bele goja, maibé atu buat hotu-hotu bele la’o presija partisipasaun entidade hotu-hotu,” nia hateten.

Ernesto de Oliveira da Silva mós sei kontinua hadi’a programa ne’ebé Prezidente sesante halo, kona-bá projetu estrada, ponte no seluk tan.

“Ha’u mai atu halo saida mak di’ak halo diak liu tán, saida mak seidauk di’ak ha’u halo di’ak liu tan,” nia promete.

PAM sesante rekoñese la rezolve problema barak

Prezidente Autoridade Munisípiu (PAM) Bobonaro sesante, Jeferino Soares do Santos, rekoñse durante mandatu seidauk rezolve problema barak, liliu infraestrutura bázika, tanba serbisu balun la’ós kabe ba kompenténsia Autoridade munisipál.

“Durante Mandatu tinan lima, iha infraestrutura barak mak seidauk rezolve, tanba serbisu balun ita labele halo, maibé ba oin ha’u prontu apiou PAM foun,” nia rekoñese.

Iha serimónia ne’e, Governo atribui sertifikadu apresiasaun ba PAM Bobonaro sesante, Jeferino Soares dos Santos, ba kontribuisaun durante tinan lima to’o mandatu remata, alende ne’e entrega mós kargu no patrimóniu Estadu ba PAM foun.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here