Vise-Prezidente ANPM ba Asuntu Explorasaun no Exploitasaun Minerál, José Gonçalves. Imajen TATOLI/Francisco Sony

DILI, 02 jullu setembru 2021 (TATOLI)—Vise-Prezidente Autoridade Nasionál Petróleu no Minierál (ANPM) ba Asuntu Explorasaun no Exploitasaun Minerál, José Gonçalves, informa, hahú janeiru to’o 30 juñu tinan ne’e, autoridade rekolla ona reseita hamutuk millaun $1,5 hodi hatama ba kofre Estadu.

“Reseita sira hosi atividade minieru, liuliu extrasaun atividade konstrusaun, maski iha situasaun pandemia maibé ita konsege kolleta to’o juñu hamutuk millaun $1,” Vise Prezidente ANPM hateten ba Agência TATOLI, iha ninia knaar fatin, edifísiu Ministériu Finansa, Aitarak-laran, Dili.

Retornu ne’e rekolla hosi empreza nasionál no internasionál sira ne’ebé hetan ona lisensa ambientál no hala’o atividade pedreira no rai-henek, hafoin selu taxa depende ba kualidade no kuantidade.

“Ita sei kontinua rekolla reseita sira ne’e no espera katak tinan ne’e nia rohan ita bele kolleta reseita millaun $1, maski la to’o hanesan tinan kotuk ne’ebé konsege rekolla millaun $2,4,” nia otimista.

Prosesu selu taxa no multa, ANPM fó invoice ba empreza sira hodi selu direta iha Banku Nasionál Ultramarinu (BNU) liuhosi konta Estadu.

ANPM halo kalkulasaun fatuk no rai henek ne’ebé empreza sira foti liuhosi sistema monitorizasaun teknolojia avansadu, uza kámara drone ne’ebé semo no sura kuantidade, hafoin aplika administrasaun ka selu taxa.

Kona-ba atividade esplorasaun fatuk no rai henek ilegál, tuir dirijente ne’e, bainhira ANPM deteta sei fó sansaun tuir kálkulu kuantidade ne’ebé empreza hasai no fa’an ona.

Tuir dadus, ANPM fó ona lisensa ambientál ba empreza nasionál no internasionál hamutuk 10 hodi hala’o atividade extrasaun mineiru iha territóriu Timor-Leste.

 Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here