Koordenadór Gabinete Sosiedade Sivíl, Filipe da Costa. Imajen TATOLI/Francisco Sony

DILI, 02 jullu 2021 (TATOLI)—Koordenadór Gabinete Apoiu Sosiedade Sivíl (GASC, sigla portugés), Filipe da Costa, hateten, gabinete ne’e serbisu hamutuk ho Ministériu Saúde (MS) hodi garante implementasaun fundu globál ba redusaun moras espesífiku iha Timor-Leste.

“Kona-ba fundu globál, ha’u relata ba Primeiru-Ministru katak Timor-Leste hetan fundu adisionál millaun $15,7 molok ne’e ba siklu 2021-2023 atu finansia programa elemina moras HIV/SIDA, Malária, TBC,” Koordenadór relata hafoin ramata reuniaun ho Xefe Governu iha Rezidénsia Farol, sesta ne’e.

Governu Amérika aloka bilaun $3,5 atu fó apoiu ba nasaun sira iha ámbitu pandemia no hosi totál ne’e Timor-Leste konsege hetan millaun $4,7.

Nune’e, MS mak implementa programa, atu nune’e bele tau-matan ba prevensaun no eleminasaun moras COVID-19 iha Timor-Leste.

“Ha’u informa ami-nia monitorizasaun ba implementasaun fundu ne’e foin lalais  iha munisípiu tolu (Liquiçá, Ermera no Bobonaro), ne’ebé iha asuntu balun mak la’o di’ak maibé balun presiza mellora liután,” Koordenadór haktuir.

Ho ida-ne’e, Xefe Governu fó orientasaun GASC atu serbisu hamutuk MS atu mellora liután serbisu no atendimentu, hodi nune’e bele kombate moras tolu ne’e iha rai-laran no hadook-an hosi surtu COVID-19.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here