Koordenadór Gabinete Apoiu Sosiedade Sivíl, Filipe da Costa. Imajen TATOLI/Egas Cristóvão

DILI, 02 jullu 2021 (TATOLI)—Koordenadór Gabinete Apoiu Sosiedade Sivíl (GASC, sigla portugés), Filipe da Costa, relata progresu programa prioridade tolu tinan ne’e ba Primeiru-Ministru (PM), Taur Matan Ruak.

“Mai atualiza servisu no lala’ok iha gabinete, ami iha programa importante tolu,” Koordenadór informa hafoin ramata reuniaun ho Xefe Governu iha Rezidénsia Farol, sesta ne’e.

Programa hirak ne’e mak jere fundu apoiu sosiedade sivíl, ne’ebé fó fundu ba organizasaun sosiedade sivíl iha Timór laran tomak, GASC sai hanesan sekretariadu ba Movimentu Scaling Up Nutrition (SUN) ne’ebé Governu Timor-Leste adere ona iha tinan 2020 no programa ikus hanesan jestór ba fundu globál ne’ebé fó tratamentu ba moras HIV/SIDA, Malária no TBC iha Timor-Leste.

“Gabinete Apoiu Sosiedade Sivíl halo ona ezekusaun fundu ho di’ak no ami-nia obligation ne’e besik 50% no programa balun la’o ona,” nia akresenta.

Relasiona ho ezekusaun ne’e, tuir Koordenadór projetu sira ne’ebé la’o ona maka organizasaun 12 novembru, ne’ebé halo programa kona-ba reidentifikasaun membru 12 novembru, halo programa ekonomia hanesan fó treinamentu ba negosisiente no implementa fundu rotativu sira inklui halo uma ba kbiit laek.

“Ha’u kontente relata ba Primeiru-Ministru katak 12 novembru ninia uma ida, sira halo iha suku Becora, aldeia Bedois gasta osan $9.000 ho kondisaun kapas tebes no organizasaun sira seluk hanesan Makledo iha munisípiu Liquiçá ne’ebé halo programa kona-ba família ninian,” nia haktuir.

Kona-ba movimentu SUN, parte gabinete sei iha atividade tolu iha tinan ne’e hanesan diseminasaun planu konjunta ne’ebé sekretariadu prepara ona kona-ba hadi’a nutrisaun no seguransa ai-han iha Timor-Leste, ne’ebé dokumentu sei lansa iha loron 05 jullu 2021 hafoin distribui ba liña ministériu atubele konsidera durante planu orsamentu 2022.

Atividade seluk maka sei organiza eventu ida naran ‘Prémiu Nutrisaun’, ho objetivu fó oportunidade ba grupu hanesan feto, joven, no agrikultura hodi kompete.

“Primeiru-Ministru konkorda atu fó sertifikadu ba manan-na’in,” Filipe hatutan.

Sekretariadu SUN mós sei realiza diálogu nasionál hodi ko’alia kona-ba sistema ai-han iha Timor-Leste, kreximentu nutrisaun no kualifikasaun edukasaun.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here