Ministru Ensinu Superiór, Siénsia no Kultura (MESSK), Longuinhos dos Santos. Imajen Tatoli/Egas Cristóvão

DILI, 02 jullu 2021 (TATOLI) – Ministru Ensinu Superiór Siénsia no Kultura (MESSK) Longuinhos dos Santos, afirma katak regra hotu ne’ebé bolseiru sira tenke kumpre kontempla hotu ona iha akordu entendimentu (MoU/Memorandum of Understanding) nia laran. tanba ne’e, bainhira bolseiru sira la kumpre sei aplika tuir lei maka vigora.

Ministru Longuinhos dos Santos, afirma Fundus Dezenvolvimentu Kapitál Umanu (FDCH) iha regra tuir MoY bolseiru ida ho kontratu bá eskola iha Portugál nia tenke finaliza estudu iha duni universidade nasaun refere.

“Se bolseiru ne’e hakarak halo mudansa bá kontratu estudu ho universidade refere atu bá fali universidade iha nasaun seluk la iha koñesimentu hosi FDCH ka instituisaun ne’ebé nia servisu bá automatikamente sei hetan sansaun hodi devolve fali osan ne’ebé nia uza ona,” Ministru Longuinhos Agência Tatoli iha Salaun Ian Martin, INFORDEPE, foin lalais ne’e.

Nia esplika kazu ida ne’e akontese mós bá funsionáriu Públiku ida servisu iha Universidade Nasional Timor Lorosa’e (UNTL) ne’ebé sai bolseiru maibé la kumpre regra kontratu ne’ebé estabelese ona.

Nia hetan kontratu ho FDCH hodi bá eskola iha  Portugál maibé la remata nia muda fali bá fatin seluk, signifika komete ona irregularidade tanba ne’e nia tenke submete bá lei ne’ebé vigora.

Diretora Ezekutiva FDCH, Leila Cárceres dos Santos. Imajen Tatoli/Egas Cristóvão

Diretora ezekutiva FDCH, Leila Cárceres, esplika katak dekretu lei FDCH númeru 13/2020 fó kompeténsia bolsa estudu mós bá funsionáriu públiku sira liuhosi Komisaun Funsaun Públiku (KFP) no mós INAP.

Kompeténsia FDCH nian atu prevee orsamentu fasilita funsionáriu públiku atu hetan bolsa estudu. Maibé funsionáriu hetan bolsa estudu ne’e sei halo kontratu hodi kesi ninia estudu ne’e ho instituisaun ne’ebé nia  servisu bá.

Nia fó ezemplu funsionáriu UNTL  ne’ebé komete irregularidade ne’e kompeténsia instituisaun nian. Bainhira nia bá eskola iha rai-li’ur UNTL mak halo akompañamentu ba ninia prestasaun sira durante eskola.

Nia afirma tan, kuandu bolseiru ne’e la konsege finalize nia prestasaun akadémiku tuir kontratu ne’ebé vigora, instituisaun rasik iha obrigasaun fó xamada atensaun verbál no eskrita hodi hapara nia kontratu.

Papél Komisaun Funsaun Públiku (CFP) iha obrigasaun atu ejerse ninia funsaun iha prosesu prestasaun akadémiku ne’ebé funsionáriu ida halo iha ninia estudu ne’e. Tanba funsionáriu ida atu hala’o estudu sempre hetan lisensa de estudu hosi CFP rasik.  Tanba ne’e, bainhira funsionáriu ne’e la konsege termina ninia estudu, maka fila fali bá CFP nu’udar na’in bá funsionáriu públiku sira hodi fó sansaun.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here