Japan Maritime Self Defense Force. Imajen/Espesiál

DILI, 02 jullu 2021 (TATOLI) – Forsa Auto-Defeza Marítima Japaun haruka nia eskuadraun treinamentu mai Timor – Leste no ida-ne’e kruzeiru treinamentu ida ba ofisiais juniór sira ne’ebé mak foun gradua hosi Eskola ba Kandidatu Ofisiais.

Liuhusi treinamentu ne’e, ofisiais juniór sira sei lori ba prátika koñesimentu no espíritu ne’ebé mak sira hetan iha eskola no prepara sira nia an hodi sai lideransa JMSDF iha futuru.

Iha tempu hanesan, sira mós promove daudaun relasaun amizade ho nasaun hirak ne’ebé mak sira vizita.

Kruzeiru treinamentu oseanu ida ne’e hala’o ona kada tinan dezde 1957 no kruzeiru tinan ida ne’e nian mak kruzeiru ba dala-65.

Kruzeiru ne’e sei to’o iha Dili, 03  jullu hosi Indonézia no arranka hikas ba Filipinas iha loron 05 jullu, tinan ne’e.

“Ha’u sente kontente  tebes hodi simu kadete ofisiais Naval Japonés, ha’u espera katak ita-boot sira nia vizita mai Timor-Leste bele sai esperiénsia memorável ida, no sempre hanoin ami nia nasaun nia naran Timor-Leste,” Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hateten liuhosi komunikadu ne’ebé Tatoli asesu.

Lere hatutan, ida ne’e la’ós rohan, maibé foin mak primeiru iha Timor-Leste. Tanba ne’e, nia espera katak jornada amigavél ida no inspira sira-nia karreira iha futuru.

Iha sorin seluk, Embaixadór Japaun iha Timor Leste, Masami Kinefuchi, hateten vizita militár Japaun mai Timor-Leste ne’e hanesan meiu ida hodi hametin liután nasaun rua nia lasu amizade.

“Ksolok ba ha’u hodi simu vizita hosi Esquadrão Treinamentu mai Timor-Leste. Japaun no Timor-Leste hala’o ona relasaun amigavél durante tinan 20-resin, liuhosi PKO no atividade harii nasaun nian, nune’e mós interkámbiu hosi ema ba ema,” Embaixadór Masami Kinefuchi  hateten.

Akademia Defeza Nasional Japaun simu daudaun kadete Timoroan na’in-rua (2) kada tinan.

Yoshikazu ISHIMAKI, Contra-Almirante, no Komandante Kruzeiru Treinamentu Exterior, Forsa Auto-Defeza Marítima Japaun nian sente haksolok tanba sira nia Kruzeiru bele eskala iha Dili.

“Ho ksolok boot ami nia Kruzeiru Treinamentu Exterior bele mai halo eskala iha Dili, primeira vez. Objetivu hosi ami nia Kruzeiru Treinamentu Exterior mak atu ami nia ofisiais foun sira bele hetan koñesimentu no abilidade báziku hodi bordo ró, hodi haluan sira nia vizaun global no hodi promove amizade ho nasaun hirak ne’ebé mak sira vizita,” Yoshikazu ISHIMAKI hateten.

 Jornalista      : Hortencio Sanchez

Editór             : Francisco Simões

 

HAKEREK NO HATÁN

Please enter your comment!
Please enter your name here