Reitór UNTL, João Soares Martins. Imajen Tatoli/Egas Cristóvão.

DILI, 02 jullu 2021 (TATOLI) – Avaliasaun Universidade Nasionál Timor Lorosa’e (UNTL) nian ba prosesu implementasaun ensinu aprendizajen online la susesu (falla) tanba fornesimentu liña internet hosi kompañia operadór telekomunikasaun sira la estavel.

Magnífiku Reitór UNTL, João Soares Martins, hateten difisil tebes ba UNTL atu implementa sistema online no zoom meeting bá estudante sira tanba liña internet lentu demais.

“Rezultadu ne’e ami hetan liuhosi prosesu avaliasaun semanál bá implementasaun prosesu ensinu aprendizajen online. Ami konsidera kompañia operadór telekomunikasaun sira la apoiu másimu bá sistema ne’e,” Reitór João Soares Martins hateten bá jornalista sira iha ninia kna’ar fatin, UNTL, Dili, sesta ne’e.

Nia esplika avaliasaun seluk sira halo bá utilizasaun online ne’e, kuaze estudante barak mak la partisipa tanba razaun ekonomia fraku labele sustenta sira atu sosa pulsa, inklui estudante barak mós laiha telefone android no laptop hodi partisipa iha programa ne’e.

UNTL  hato’o ona sujestaun balun atu husu hasa’e velosidade rede internet nian. Nune’e bele fasilita estudante no dosente-sira bele implementa ensinu aprendizajen online nee ho efikásia.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here