Ekipa Gabinete PA RAEOA-SEESM hamutuk ho Xefe Aldeia no Xefe Suku, kontinua distribui apoiu umanitaria ba kbi’it laek sira iha Aldeia Bonemese, Suku Naimeko, Pante Makassar, sesta (15/05/2020). Imajen Gabinete PA RAEOA-ZEESM.

OÉ-CUSSE, 02 Jullu 2021 (TATOLI)—Autoridade Rejiaun Administrativa Espesiál Oé-Cusse Amebo (RAEOA) liuhosi Sekretáriu Rejionál Asuntu Agríkultura sei fó apoiu foos saka 3.616 ba uma kain 904 durante ba fulan haat (4) nia laran.

Sekretáriu Rejionál Asuntu Agrikultura, José Eta, hateten autoridade RAEOA iha polítika atu fó apoiu ba abitante sira tanba dezastre naturál no siklone tropikál Seroja ne’ebé akontese iha 04 abríl ne’e, halo abitante no agrikultór sira barak mak falla kolleta.

Notísia Relevante: Agrikultór natar suku Cunha hahú halai natar faze daruák

Sekretáriu Rejionál Asuntu Agríkultura, José Eta. Imajen/Mídia SRAA-RAEOA.

“Abitante hirak ne’e falla kolleta tanba sikolene tropikál Seroja akontese ne’ebé rezulta rai halai, mota sobu natar no anin estraga ai-han iha to’os laran. Ami halo identifikasaun ba sub-rejiaun haat (4) ne’e hetan uma kain 904 mak falla kolleta iha tinan ne’e, entaun ami iha hanoin atu fó apoiu foos ba sira,” José Eta, informa ba Agência Tatoli iha nia servisu fatin, Pante Makasar, Oé-Cusse, sesta ne’e.

Hosi rezultadu identifikasaun ne’e, autoridade deside fó apoiu ba abitante hirak ne’e ho kada uma kain ida sei simu foos saku ida durante fulan haat (4) nia laran, hahú hosi fulan-jullu to’o fulan-outubru 2021.

Tanba, nia dehan, uma kain 904 ne’ebé sira-nia to’os no natar hetan estragu hosi siklone tropikál Seroja ne’e, natar ne’ebé hetan estragu barakliu ne’e iha sub-rejiaun Pante Makasar kompara ho sub-rejiaun tolu (3) seluk.

“Apoiu foos ba abitante sira-ne’e aprovadu ona hosi rezidente autoridade. Foos sira-ne’e agora tau ona iha armajen agríkultura iha sentru Aen-Mat. Semana oin, ita sei konvida xefe suku sira atu aprezenta lista ba sira atu halo distribuisaun iha baze,” nia haktuir

Jornalista : Abilio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here