Diretór Ezekutivu ANAAA, Edmundo Viegas. Imajen Tatoli/Nelia Fernandes.

DILI, 02 jullu 2021 (TATOLI)—Ajénsia Nasionál Avaliasaun Akreditasaun Akadémiku(ANAAA), tuir planu sei halo lansamentu Akreditasaun Programátiku no Institusionál iha Universidade Orientál Timor Lorosa’e (UNITAL) ne’ebé sei lansa hosi Ministru Ensinu Superiór Siénsia no Kultura (MESSK), Longuinhos dos Santos.

Notísia Relevante: Fulan oin, ANAAA hahú halo avaliasaun no akreditasaun ba instituisaun ualu

“Iha fulan-jullu, entre iha loron 19 to’o 23 ne’e, ami sei koordena ho Gabinete Ministru nian hodi deside loron ida atu halo lansamentu ba akreditasaun programátiku no institusionál ne’ebé sei realiza iha UNITAL no Ministru Longuinhos dos Santos mak sei halo lansamentu,” Edmundo Viegas hateten ba Agência Tatoli, iha nia knaar fatin, INFORDEPE, Dili, ohin.

Tuir palnu, iha primeiru semestre tinan ne’e ANAAA sei foku ba halo preparasaun no estabelese tiha ona kontaktu ho universidades sira, no simu tiha ona lista kona-ba kursu sira hotu ne’ebé sei sujeita ba avaliasaun no akreditasaun ba tinan ida-ne’e.

“ANAAA infoma ba Universidade ualu ne’ebé sira-nia prazu avaliasaun institusionál ramata ona iha tinan ida-ne’e, purtantu tenke re-avalia no re-akredita fali,” nia dehan.

Avaliasaun no akreditasaun ne’e sei haree ba grupu rua (2) mak hanesan grupu kursu no grupu instituisaun. Ggrupu kursu nian sei fahe ba grupu rua (2) mak hanesan grupu baxarelatu-lisensiatura no grupu post graduasuan maestradu, maibé ko’alia kona-bá objetu avaliasaun mak kursu no instituisaun.

ANAAA sei hahú uluk halo avaliasaun ho kursu ne’ebé ministru sei lansa iha terseira semana jullu ne’e. Iha biban ne’e, hahú kedas ho avaliasaun kursu ne’ebé prontu ona.

“Hahú iha semana lansamentu ne’e provavelmente ne’e, ita hahú ho kursu lima. Nune’e, depois tuir mai halo hanesan ne’e to’o ramata iha fulan setembru nia rohan,” nia informa.

Lista provizoriamente ANAAA prepara ba kursu ne’e hamutuk 22 no daudaun ne’e halo hela revizaun ba sira-nia esbosu relatóriu ne’e.

“Ba instituisaun ne’ebé sira-nia kursu prontu ona, ami sei avalia iha semana lansamentu ne’e entre loron 19 to’o 23 jullu,” nia dehan.

Kursu sira hosi Instituisaun Ensinu Superíor ne’ebé atu avalia no akredita mak hanesan Universidade Dili (UNDIL) iha kursu Lisensiatura tolu hanesan Enfermajen Dentária, Saúde Públika no Enjeñaria Petróleu.

Universidade da Paz (UNPAZ) iha kursu Lisensiatura rua mak hanesan Lisensiatura Estudu ba Paz no Seguransa no Enjeñaria Sivil, no Maestradu rua mak hanesan maestradu em Saúde Públika no Administrasaun Públika no sira sei hatama tan maestradu ba Direitu.

Universidade Oriental Timor Lorosa’e (UNITAL) iha kursu Lisensiatura Direitu, Peska, Administrasaun Públika, Enfermajen no Saúde Públika. Hosi kursu lima ne’e, nia relatóriu ANAAA simu ona no revee hela maibé sei falta kursu Komunikasaun Sosiál no Floresta.

Institutu Superior Cristal (ISC) iha kursu hanesan Lisensiatura Enfermajen no Baixarelatu Parteira. Institute of Tecnology (DIT) iha kursu hanesan Maestradu Administrasaun Negósiu. Institute of Business (IOB) iha kursu hanesan Kontabilidade Komputadór.

Universidade Nasional Timor Lorosa’e (UNTL) iha kursu hanesan Lisensiatura, Farmásia, Nutrisaun, Komunikasaun Sosiál, Ensinu Língua Tetun, Kontabilidade, no Baxarelatu Ensinu Edukasaun Fisika Desportu.

“Ami espera hosi lista ne’ebé hatama ne’e bele preparadu para ami avalia no akredita. Ida-ne’e mak oras ne’e ami prepara hela, nune’e balun ne’ebé mak prontu uluk ona, ami sei avalia iha semana lansamentu ne’e entre 19 to’o 23 jullu ne’e. Hein katak to’o setembru ne’e ramata ona, nune’e setembru nia rohan ne’e ami foku de’it ona ba avaliasaun ba instituisaun nian,” nia akresenta.

Entretantu ANAAA sei halo avaliasaun no akreditasaun ba instituisaun ualu mak hanesan Universidade Nasional Timor Lorosa’e (UNTL), Universidade da Paz (UNPAZ), Institute of Business (IOB), Institute of Tecnology (DIT), Institutu Profisionál de Canossa (IPDC), Institutu Superior Cristal (ISC), Institutu Siénsia Relijioza (ICR) Lahane, no Institutu Katólika Formasaun Profesores (ICFP) Baucau.

“Instituisaun ualu ne’e, sei tuir akreditasaun no avaliasaun institusionál. Akreditasaun institusionál sei hala’o iha fulan setembru to’o novembru, tinan ida ne’e,” nia dehan.

Notísia Relevante: ANAAA sei adota sistema avaliasaun-akreditasaun institusionál liuhosi plataforma online

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here