Koordenador Nasionál Civil Society Education Partnership (CSEP), José de Jesus. Imajen Tatoli/Nelia Fernandes.

DILI, 0jullu 2021 (TATOLI)—Sentru Formasaun Action for Change Foundation (ACF) liuhosi Civil Education Society  Partnership (CESP) hala’o peskiza ida hanaran Yout Action Research (YAR) iha 2019, hodi identifika juventude Timor-Leste nia problema hanesan juventude sira-ne’ebé la asesu ba edukasaun no kaben.

Koordenador Nasionál Civil Education Society Partnership (CSEP), José de Jesus, hateten peskiza ne’e membru CESP hala’o iha munisípiu lima mak hanesan munisípiu Díli, Aileu, Ainaro, Liquiça no Bobonaro.

“Iha munisípiu lima ne’e, ami halo peskiza ne’e ho intensaun atu identifika problema juventude nian ne’ebé akontese iha TimorLeste, hanesan desafiu ba joven sira, liu-liu ba joventude marjinalizadu hanesan joven ne’ebé tertingal iha munisípiu hanesan sira la asesu ba oportunidade edukasaun, laiha oportunidade atu asesu ba empregu, tanbá ho problema sosiál hanesan difikuldade iha familia, familia la suporta sira to’o iha nível sekundáriu no universidade no balun kaben sedu,” José de Jesus hateten ba Agência Tatoli, liuhosi telefónika, sesta ne’e.  

Kaben sedu sai hanesan problema ida-ne’ebé joven sira enfrenta, tanbá joven sira-ne’ebé laiha ona oportunidade atu ba kontinua estudu, sira fila ba vida agrikultura entaun sirania opsaun ida de’it hanesan hola feto ka hola mane iha idade ne’ebé ki’ik.

Ida-nee’, sai hanesan dezafiu ba joven sira atu dezenvolve sirania kareira iha edukasaun no hetan servisu ne’ebé di’ak no involve direta iha dezenvolvimentu.

Rezultadu hosi peskiza ne’e, CESP aprezenta ona ba ministériu relevante hanesan Sekretáriu Estadu Formasaun Profisionál Empregu (SEFOPE), Ministériu Edukasaun, Juventude no Desportu (MEJD), Sekretáriu Estadu Juventude no Desportu (SEJD) no Gabinete Apoia Sosiedade Sivil.

“Ita aprezenta ona rezultadu peskiza ba ministériu relevante sira, atu sira tau iha konsiderasaun. Bainhira halo planu ka polítika ruma karik bele aloka orsamentu ba sira, hodi fó prioridade ba dezenvolvimentu juventude no dezenvolvimentu setór edukasaun ne’ebé bele responde ba joven sirania situasaun,” nia heteten.

Rezultadu peskiza ne’e, lansa tiha ona iha fulan-novembru tinan 2020 ne’ebé lansa hosi Ministériu Edukasaun, Juventude no Desportu (MEJD) liuhosi Diretora Jerál, Odilia Ung Martins, no hetan mós partisipasaun hosi reprezentante Sosiedade Sivil, mídia no juventude marjinalizadu hosi munisípiu 13.

Hosi peskiza ne’ebé hala’o iha munisípiu lima hanesan Díli, Aileu, Ainaro, Liquiça no Bobonaro ne’’e, hetan joven marjinalizadu hamutuk na’in-175 no hosi hosi númeru ne’e kada munisípiu joven marjinalizadu hamutuk na’in 35.

Peskiza ne’e ACF halo ba joven marjinalizadu ne’ebé hela iha área rurál hanesan la asesu ba edukasaun, kaben sedu, abandona eskola, no ekonómia familia la sufisiente atu sira kontinua sira-nia estudu.

Notísia Relevante: Governu Japaun apoia rihun $90 ba ACF reabilita sentru saúde Lautém

Jornalista : Nelia Fernandes

EDitór      : Cancio Ximenes