Produtu Cesta Bázika iha bote-laran Imajen TATOLI/Antónia Gusmão

BOBONARO, 02 jullu 2021 (TATOLI)—Abitante 160 iha suku Ritabou, postu administrativu Maliana, munisípiu Bobonaro, seidauk simu Cesta Bázika hosi Governu.

Xefe suku Ritabou, Maximiano dos Santos Araújo, esplika durante prosesu distribuisaun Cesta Bázika iha suku ne’e, komunidade 160 la hetan tanba sasán balun iha item la kompletu.

Notísia relevante:MAP submete pedidu pagamentu Cesta Bázika kompañia 17 ba MF

“Komunidade ne’ebé la simu tanba sasan mak la to’o de’it, balun simu sasan la kompletu. Ida-ne’e  mak halo ha’u preokupa loos,” Maximiano dos Santos Araújo, hateten ba jornalista Agência Tatoli, sesta ne’e.

Antes ne’e Autoridade lokál ne’e aprezenta kedan preokupasaun ba kompañia atu halo fali distribuisaun, maibé to’o oras-ne’e seidauk hetan resposta.

Tanba ne’e, nia husu Governu Ministériu implementadór-sira atu rezolve lalais problema ne’e, tanba povu tomak iha direitu atu hetan Cesta Bázika.

Komunidade Lino Tavares, mós preokupa tanba seidauk hetan nia-direitu, maibé iha nafatin esperansa katak, Governu sei buka solusaun atu rezolve lalais prekupasaun ne’e.

“To’o ohin loron ami la simu sasan. Iha momentu distribuisaun ne’e ami ba duni, maibé sasan mak la to’o,” nia hateten.

Suku Ritabou iha aldeia 12 ho totál populasaun 7.881 hosi totál xefe família hamutuk 1.600-resin.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here