STAE Munisípiu Viqueque ofisiálmente lansa resenseamentu eleitorál. Imajen Tatoli/Vitorino Lopes da Costa

VIQUEQUE, 01 jullu 2021 (TATOLI) – Sekretariadu Tékniku Administrasaun Eleitorál  (STAE) Munisípiu Viqueque, kinta ne’e, ofisiálmente lansa resenseamentu eleitorál no atualiza dadus eleitorál hodi partisipa eleisaun prezidensiál iha tinan 2022.

Notísia Relevante : STAE-CNE lansa resensiamentu eleitorál ba preparasaun eleisaun prezidensiál 2022

Diretór STAE Munisípiu Viqueque, Humberto Fernandes, hateten serimónia lansamentu resenseamentu eleitorál ne’e hanesan mós preparativus atu ofisializa funsionáriu STAE nian hodi destaka ba iha postu administrativu lima halo atendimentu eleitorál no atualiza baze dadus sira.

“Hahú ohin ne’e, funsionáriu STAE na’in-15 destaka ona ba postu administrativu lima sira hodi hala’o servisu resenseamentu eleitorál no atualiza baze dadus prepara ba eleisaun prezidensiál ne’ebé realiza iha tinan oin,” Humberto Fernandes hateten ba Agência Tatoli iha STAE Viqueque.

Funsionáriu  STAE destakadu resenseamentu eleitorál kompostu hosi pontu vokál, asistente operadór no operadór tékniku hamutuk na’in-15. Ho ida ne’e, hodi mellora servisu resenseamentu eleitorál atu besik liután iha komunidade sira liuliu iha nivel postu lima iha Munisípiu Viqueque.

Iha fatin hanesan komandante PNTL Munisipiu Viqueque,  Superintendente Sevestião Alves Quintão hatutan, PNTL Munisipiu Viqueque sei garante seguransa iha postu sira, se karik mosu ameasa ruma tenke informa ba parte seguransa hodi halo atuasaun.

“Ha’u fiar 100% imi ba hala’o servisu laiha ema ida mak ameasa. Ha’u enkoraja ita boot sira hodi ba servisu ho avontade no mantein komunikasaun ba malu,” Superintendente Sevestião Alves Quintão hateten.

Adjuntu Administradór Munisípiu Viqueque, José da Costa de Sousa, rekomenda ba funsionáriu STAE ne’ebé destaka ba postu lima (5), Viqueque Villa, Ossu, Lacluta, Uatulari no Uatucarbau, tenke servisu ho responsabilidade no atendimentu ho neutralidade hasoru populasaun sira.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here