Monumentu Viqueque. Imajen/Wikipedia.

VIQUEQUE, 01 jullu 2021 (TATOLI)- Jestór operasionál Sentru Juventude Viqueque (SJV), Juvinal da Costa, informa sentru juventude Munisípiu Viqueque iha ona programa hodi enkoraja juventude sira nia kriatividade liuhosi empreendedorizmu sosiál.

“Ami-nia programa empreendedorizmu sosiál sei haree liubá kriatividade juventude sira nian hanesan pekuária, peska no ortikultora, ami sei fasilita fundu ba juventude sira hodi la’o sira-nian atividade no hakarak enkoraja juventude sira iha área empreendedorizmu nian,” Juvinal da Costa informa ba Agência Tatoli iha SJV, kinta ne’e.

“Ami hetan fundu hosi Sekretáriu Estadu Juventude no Desportu (SEJD) hamutuk $33.000,00 fundu ne’e sei apoiu ba juventude sira ne’ebé halimar de’it para motiva sira halo servisu rasik,”  nia tenik tan.

Nia esplika, programa empreendedorizmu sosiál ne’e juventude sira maka kria rasik grupu no planu ba atividade saida mak sira atu realiza. Nune’e  hato’o proposta administradór postu mak sei halo selesaun ba proposta sira ne’ebé grupu juventude kada grupu ida sei hetan montante orsamentu $600,00.

Totál fundu hosi SEJD hamutuk $33.000,00 hodi Sentru Juventude Viqueque realiza programa empreendedorizmu sosiál 2021, sei apoiu orsamentu ba grupu juventude sira, postu Viqueque villa ho suku 10, iha grupu 15 alokasaun orsamentu hamutuk $9.000,00, postu Ossu iha suku 10, grupu hamutuk 15 alokasaun orsamentu hamutuk $9.000,00.

Postu Uatulari ba suku neen (6), alokasaun orsamentu hamutuk $6.000,00, postu Uatucarbau suku neen (6) ho alokasaun orsamentu hamutuk $6.000,00 no postu Lacluta iha suku haat (4) ho alokasaun orsamentu hamutuk $3.000,00.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here