Pesoál saúde prepara hela vasina Sinovac. Imajen TATOLI/Francisco Sony

DILI, 01 jullu 2021 (TATOLI)—To’o 30 juñu, Komisaun Interministeriál ba Implementasaun vasina COVID-19 iha Timor Leste (TL), rejista sidadaun 27,6% mak simu ona vasina.

“Vasina ne’ebé mak ita atinji ona iha Munisípiu Dili hamutuk 52.7% no iha nível nasionál ita atinji ona 27,6%,’’ Diretora Jerál Prestasaun Serbisu Saúde, Odete da Silva Viegas, hateten iha salaun Ministériu Saúde, Caicoli, kinta ne’e.

Notísia relevante:Hilária de Jesus hakotu-iis hafoin simu vasina AstraZeneca

Odete da Silva Viegas, esplika vasina ne’ebé mak utiliza iha Timor-Leste, la’ós obrigatóriu maibé Ministériu Saúde haree katak, populasaun iha entuasiazmu boot tebes, signifika ema hotu-hotu tauk moras ne’e, no fiar katak moras eziste duni.

Nia mós apela nafatin ba populasaun tomak atu partisipa hodi vasina no labele rona boatus, nune’e bele atinji 70% hodi proteje di’ak liu tán ida-idak nia an, sosiedade no salva nasaun tomak.

Alende ne’e, husu ba Ministériu relevante-sira no parseiru-sira hotu-hotu hamutuk ho sosiedade sivíl, inklui Igreja  Katólika atu luta hamutuk kombate moras ida-ne’e.

Iha 30 juñu, Austrália oferese tan vasina AstraZeneca doze rihun 65 mai Timor-Leste (TL).

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here