Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

LAUTÉM, 01 jullu 2021 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hateten, parte tékniku prontu instala Rádiu Komunidade streaming online iha suku Fuat, postu administrativu Iliomar, munisípiu Lautém, bainhira iha proposta, nune’e bele diversifika informasaun.

“Karik iha proposta harii Rádiu Komunidade iha ne’e, semana oin iha ona resposta tamba tinan ne’e iha planu harii tolu tan, ida iha parte Leste, ida iha Oeste parte fronteira no ida ha’u fó ona ba ema ho defisiénte sira,” Sekretáriu Estadu dehan durante diálogu komunitáriu iha sede suku Fuad, kinta ne’e.

Notísia relevante: ADTL agradese Governu estabelese rádiu komunidade ba ema ho defisiénsia sira

Inisiativa ne’e tanba governante ne’e nota katak iha suku Fuat, kondisaun estrada seidauk di’ak, komunidade hela dook malu, balun iha k’nua susar atu halo komunikasaun, nune’e aproveita moderniza meiu komunikasaun hodi fasilita komunikasaun.

“Ha’u iha vizaun ida atu dezenvolve suku digitál, nune’e bainhira Xefe suku ko’alia buat ruma lalika ba Dili, lalika lori motor tanba risku boot maibé ita koko took tau planu hodi digitaliza sistema iha ne’e, nune’e ita boot sira uza atu komunika ba Governu sentrál,” nia akresenta.

Nia konsidera, iha era digitál ne’e iha buat a’at no di’ak, maibé importante mak bele kontrola sidadaun utiliza meiu modernu sira.

Tuir Akara, importante atu diversifika meiu komunikasaun sosiál atu povu iha área rurál la presiza hein tan mídia nasionál sira bainhira atu espalla informasaun, maibé ho meiu Rádiu Komunidade bele transmite de’it hodi públika informasaun.

“Bele ka lae, Iliomar iha Rádio Komunidade ne’ebé uza Makalero, halo notísia rasik kona-ba Iliomar transmite ba ema hotu akompanã. Agora ita iha Rádio Komunidade hamutuk 16 iha Timor laran tomak, ho idaidak ninia lian,” nia tenik.

Hahú maiu 2020, SEKOMS lansa Rádio Komunidade 14 streaming online hanesan  Rádiu Komunidade Liquiça ho nia sítiu www.radiotokodede.org, Rádiu Komunidade Lospalos (www.radiolospalosvoxpopuly.org), Rádiu Komunidade Comoro, Dili, (www.radiocomoro.org), Rádiu Komunidade  Oe-Cusse (www.radioatonilifau.org), Rádiu Komunidade Ermera (www.radio-cafe.org), (www.rcc.tl), Rádiu Komunidade  Manufahi  (www.radio1912.org), Rádiu Komunidade  Manatuto, (www.radioiliwai.org), Rádiu Komunidade Baucau (www.radiomatebian.org), Rádiu Komunidade Maliana (www.radiomaliana.org), Rádiu Komunidade Maubise-Ainaro (www.radiomauloko.org), Rádiu Komunidade Viqueque (www.radiopovuviqueque.org), Rádiu Komunidade Aileu (www.radiohusar.org), no Radiu Komunidade Bucoli-Baucau (www.sahebucoli.org).

Rádiu Komunidade nu’udar meiu ida hosi SEKOMS atu fasilita hasa’e kualidade informasaun ne’ebé rádiu sira fó sai, hodi fasilita komunikasaun entre povu kada munisípiu ho Governu sentrál lhodi hato’o preokupasaun no halo promosaun no hato’o kondisaun suku.

Jornalista : Natalino Belo

Editora    : Julia Chatarina

HAKEREK NO HATÁN

Please enter your comment!
Please enter your name here