Primeiru-Ministru, Taur Matan Ruak, prezide reuniaun estraordinária Konsellu Ministru, iha Palásiu Governu, kinta (01/07). Imajen TATOLI/Francisco Sony

DILI, 01 jullu 2021 (TATOLI)–Vise-Primeiru-Ministru no Ministra Solidariedade Sosiál no Inkluzaun (MSSI), Armanda Berta dos Santos, aprezenta opsaun polítika-lejizlativa ne’ebé sai hanesan baze ba projetu reinsersaun sosiál vítima violénsia bazeada jéneru no proposta atribuisaun apoiu monetáriu ba ema sira ho kondisaun vulnerável.

Tuir Ministru Prezidénsia Konsellu Ministru, Fidelis Manuel Leite Magalhães, inisiativa ne’e hakarak garante estabelesimentu medida no mekanizmu sira ba akompañamentu no asisténsia sosiál ba vítima violénsia doméstika, ba ninia reinsersaun sosiál no resposta lais hosi entidade governamentál ba ema iha situasaun vulnerabilidade.

“Inisiativa rua-ne’e importante tebes, tanba ne’e bainhira konkretiza karik bele lori Timor-Leste ba dalan di’ak liu iha kontestu fó protesaun no apoiu sidadaun vulnerável, liliu sira ne’ebé sai vítima violénsia doméstika no hetan diskriminasaun tanba ninia preferénsia seksuál hanesan LGBTI,” Ministru hateten hafoin reuniaun ezekutivu iha Palásiu Governu, kinta ne’e.

Portavós Governu konsidera MSSI nia programa ne’e di’ak atubele apoia liután sidadaun hirak ne’e, tanba dezenvolvimentu ne’e inkluzivu no Governu tenke iha programa di’ak atu labele husik timor-oan ida ba kotuk maibé fó protesaun ba sidadaun hotu.

Aleinde ne’e, tuir Ministru halo kotu violénsia doméstika iha rai-laran de’it la to’o, maibé presiza fó apoiu ba feto sira atubele independente hola desizaun maski susar.

“Tenke hola desizaun bainhira sira sente sai vítima atubele brani halo kotu siklu violénsia ida-ne’e. Tanba ne’e Estadu iha vontade hodi garante katak sira sei protejida,” governante ne’e subliña.

Maski nune’e, Ministru seidauk fó sai detallu ezbosu lejizlativa tanba foin iha faze aprezentasaun opsaun polítika-lejizlativa.

“Tempu oin mai bainhira MSSI submete karik, sei lori sirkulasaun no sei iha konsulta oioin inklui envolve parte públiku, sosiedade sivil, liña ministeriál atubele diskute kle’an ba proposta lejizlativa ne’e,” nia hatutan.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here