Ministru Edukasaun Juventude no Desportu, Armindo Maia. Imajen TATOLI/Egas Cristovão

DILI, 01 jullu 2021 (TATOLI) – Ministériu Edukasaun Juventude no Desportu (MEJD) halo hela negosiasaun ho operadór telekomunikasaun (OT) tolu  kona-ba mekanizmu fornesimentu pulsa internet ba estudante ensinu báziku to’o sekundáriu iha territóriu nasionál.

Notísia Relevante : Indepth Reporting: MEJD nia-mehi boot iha eskola online

“Ami halo hela prosesu negosiasaun ho OT  tolu; Timor Telecom, Telemor ho Telkomcel, maibé seidauk iha rezultadu tanba sei iha diferensa presu. Balun hakarak gratuita balun dehan lae. Tan ne’e, planu atu distribui subsídiu pulsa bá estudante mós seidauk realiza,” Ministru Armindo Maia hateten hodi responde Agência Tatoli iha Palásiu Governu, kinta ne’e.

Nia afirma maske seidauk garante finalidade hosi negosiasaun ne’e, maibé MEJD promete hein semana ida ne’e atu hetan rezultadu.

Kona-bá eskola re-ativa aula prejenjiál sei bele kontinua distribuisaun pulsa ne’e ka lae? Ministru Armindo hatán, pulsa ne’e atu apoiu bá programa eskola online no bainhira eskola re-ativa , maka MEJD sei haree fali alternativu seluk.

Prosesu re-ativa ensinu aprendizajen  prejensiál, Ministru Armindo Maia, hateten  sei iha faze preparasaun no Governu sei foku bá profesór no funsionáriu administrasaun sira tenke simu hotu vasina hodi hakat bá re-ativasaun eskola.

“Ita agora antesipa hela data re-ativasaun prosesu ensinu aprendizajen prejensiál entre loron 20 ka  25 jullu 2021. Maibé importante liu maka ita foku uluk bá prosesu vasinasaun ne’e,” Armindo Maia hateten.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here