Ministru Edukasaun Juventude no Desportu, Armindo Maia. Imajen TATOLI/Egas Cristovão

DILI, 01 jullu 2021 (TATOLI) – Ministru Edukasaun, Juventude no Desportu (MEJD), Armindo Maia, afirma funsionáriu administrasaun no profesór-sira ne’ebé la simu vasina tenke aprezenta atestadu médiku, hodi aprezenta katak, ema ne’e la bele simu vasina tanba kondisaun saúde la permite.

Notísia Relevante : Hilária de Jesus hakotu-iis hafoin simu vasina AstraZeneca

“Ita presiza aprezenta evidénsia ka atestadu médiku hodi aprofunda baze administrativu tanbasá la vasina,” Ministru Armindo Maia afirma hodi responde Agência Tatoli iha Parlamentu Nasionál, kinta ne’e.

Ministru Armindo Maia afirma, pozisaun Governu nian hakarak atu sidadaun hotu tenke  hetan vasina atu bele haforsa imunidade ema ida-idak nian luta kontra pandemia COVID-19. Tanba ne’e, bainhira ema ruma lakohi simu vasina ho razaun moras tenke hatudu evidénsia hosi médiku  ka atestadu médiku.

Iha sorin seluk Diretór Eskola Ensinu Báziku Sentrál (EBC) 10 Dezembru, Comoro, Dili, Calistro Guterres, akresenta katak totál profesór iha eskola refere hamutuk na’in-49 maibé na’in-31 mak simu ona vasina no hela de’it na’in-18.

“Ha’u halo kontaktu bá profesór no funsionáriu administrasaun no guarda eskola sira seidauk simu vasina, maibé mosu razaun katak sei trata hela kondisaun tanba  moras tensaun no  moras stroke, sira moras tensaun ne’e hateten mai ha’u semana ida tan sei fó fali resposta,” Calistro Guteres tenik.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here