Sentru Saúde postu admistrativu Iliomar, munisípiu Lautém. Imajen TATOLI/Natalino Belo

LAUTÉM, 01 jullu 2021 (TATOLI)–Xefe Sentru Saúde Iliomar, postu admistrativu Iliomar, munisípiu Lautém, Narcísio Camões, hateten, daudaun ne’e profisionál saúde iha postu ne’e seidauk sufisiente atu atende komunidade.

“Seidauk sufisiente tamba ami iha suku neen, bainhira tempu udan ami iha difikuldade to’o ba komunidade, enkuantu tuir planu Ministériu Saúde (MS), parte saúde hakbesik-an ba komunidade no Komunidade asesu ba saúde, maibé kuandu udan dala-ruma ami la to’o ba inan-aman,” Xefe Sentru Saúde Iliomar, informa ba Agência TATOLI, iha ninia knaar fatin, kinta ne’e.

Autoridade suku ne’e hakarak esforsu atu aumenta tan médiku hanesan tuir planu MS, katak kada suku iha parteira, médiku, no analista.

“Espera ami-nia planu iha futuru bele atinje. Ami hakarak kada suku iha hotu enfermeira, parteira, médika no Sentru Saúde mós bele iha, atu nune’e servisu ne’e fasil no bainhira iha difikuldade ruma bele kolabora atu atendente komunidade di’ak liután,” nia akresenta.

Kona-ba fasilidade inklui stock aimoruk, normalmente hato’o pedidu ba munisípiu, hafoin sei kontinua ba Servisu Autónomu Medikamentu no Ekipamentu Saúde (SAMES) rejionál.

Maski nune’e, daudaun ne’e fasilidade hanesan aimoruk no transporte iha postu Iliomar sufisiente.

Sentru Saúde Iliomar iha médiku na’in-haat, enfermeira ualu, parteira rua permanente no na’in-tolu rejime internatu, analista ida, farmásia rua, responsável malária no nutrisaun kontratadu hamutuk rua, inklui voluntáriu hosi Caritas ida.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here