Serimónia halo’ot mate-isin Hilária de Jesus, tuir lisan Bunak Siligatal iha aldeia Olo-olo, suku Lour, postu administrativu Bobonaro, munisípiu Bobonaro, kinta (01/07/21). Imajen Tatoli/Sérgio da Cruz.

DILI, 01 jullu 2021 (TATOLI)–Primeiru-Ministru (PM), Taur Matan Ruak, fó orientasaun ba Ministra Saúde (MS), Odete Belo, no ekipa interministeriál vasinasaun kontra COVID-19, atu halo investigasaun kle’an hodi hatene loloos kauza Hilária de Jesus ho idade 73 nia mate, hosi aldeia Olo-olo, suku Lour, postu administrativu Bobonaro, munisípiu Bobonaro, hafoin simu vasina ho tipu AstraZeneca.

“Sidadaun ida infelizmente sai vítima vasina ne’ebé maka administra. Primeiru-Ministru fó ona orientasaun dahuluk ba Ministra Saúde no ekipa interministeriál vasina hotu, tenke buka ho kle’an motivu loloos sidadaun ne’ebé mate,” Ministru Prezidénsia Konsellu Ministru, Fidelis Manuel Leite Magalhães, hateten, iha Palásiu Governu, kinta ne’e.

Ministru haktuir, Xefe Governu horiseik kedas, bainhira hetan informasaun ne’e, orienta kedas Ministra Saúdem ho koordenasaun Sala Situasaun, Sentru Integradu Jestaun Krize (CIGC, sigla portugés), la’ós iha Dili de’it, maibé iha munisípiu Bobonaro no postu.

Notísia relevante: Governu-família halo’ot mate-isin Hilária de Jesus

Durante reuniaun Konsellu Ministru iha kuarta ne’e, PM kontinua informa ba MS atu fó atensaun sériu ba kestaun ne’e hodi bele esklarese ba públiku kauza loloos.

Portavós Governu esplika, vasina iha Timor-Leste la’ós Governu de’it mak realiza maibé ho envolvimentu Organizasaun Mundiál Saúde (OMS) no parseiru dezenvolviventu sira hanesan Austrália no seluk tan, ne’ebé iha papel importante iha programa nasionál vasinasaun.

“Primeiru-Ministru mós orienta Ministériu Solidaridade Sosiál no Inkluzaun (MSSI) no ministériu relevante sira atu book-an lalais atu orienta ekipa iha munisípiu fó ajuda família matebian,” nia dehan.

Jornalista : Antónia Gusmão  

Editora     : Julia Chatarina

HAKEREK NO HATÁN

Please enter your comment!
Please enter your name here