Hakerek nain, Euclidio M Marquês.

Hosi:

Euclidio M Marquês

 

Saida mak plájiu?

Konseitu plajiarizmu karik lia-fuan foun ba ema balun, maibé tuan ona iha akademista sira-nia tilun. Ema hirak ne’ebé hanaran án akademista, sem dúvida, sira intende didiak termu plajiarizmu (Plagiarism, iha lian Ingleza; plágio, iha lian portugueza). Iha fontes barak ne’ebé iha konkordánsia ba malu hodi dehan katak Poeta Marcus Valerius Martialis mak ema dahuluk ne’ebé uza lian Latin plagiarius, literalmente ‘naukten’ no refere liu ba hirak ne’ebé na’uk ema (Bill 2007, 31).

Lia-fuan ne’e espresa furak liu iha lian ingleza, kidnapper ou penenculik iha lian Indonézia (Wendy 2008, 37). Iha mós defenisaun legál romana, plagium (the stealing of a slave) katak ‘na’uk atan ida’ ou na’uk ema ida hodi trata nia hanesan atan (Bill 2007, 31). Bele hetan mós iha Collins Dictionary katak plajiarizmu ne’e hanesan prátika no uza ideia ema seluk nian hodi halo finje hanesan ninia ideia rasik. Além ida ne’e, iha matenek nain balun mós define konseitu ne’e hodi dehan katak plajiarizmu nu’udar asaun ne’ebé ema ida halo hodi ‘reproduz obra’ ema seluk nian laiha rekoñesimentu husi nain ba obra ne’e rasik (Diane 2013, 9). Reproduz obra, hakerek nain haree hosi prespetiva mundu akadémiku nian.

Lia-fuan reproduz iha kontextu ida ne’e atu esplika katak, hakerek nain ida hakerek fila-fali fraze foun ho lia-fuan ne’ebé oinseluk maibé lamuda konteúdu orijinál. Ideia ida ne’e simplesmente hanaran paraphrase iha lian ingleza ou paráfrase iha lian portugueza. Lia-fuan obra ne’ebé hakerek nain temi iha ne’e, refere liu ba propriedade intelektuál mak hanesan ema seluk ninia lia-fuan ou ema nia hakerek sira. Bainhira hakerek nain ida reproduz matenek nain seluk nia obra no uza nia lia-fuan hodi inklui iha ninia obra rasik sem uza aspas (“”), ou copy-paste sem rekoñesementu, no laiha sinál ida ne’ebé indika katak lia-fuan hirak ne’e foti hosi fonte seluk, simplesmente autór ne’e plajiatór ida, katak nia komete daudaun aktu plagiar.

Tanbasá ema komete plajiarizmu? no oinsá atu prevene!

Plajiarizmu sai hanesan polémika no nu’udar krime ida iha mundu akadémiku, liu-liu iha universidade sira. Dala-wain, matenek nain, dosente, no estudante sira iha tendensia atu desvia husi asuntu (plajiarizmu) ne’e, no lakohi atu ko’alia kona-ba ne’e, tanba ninia komplexidade. La’ós fásil atu deskobre aktu ida ne’e, tanba plajiarizmu ne’e rasik iha forma no tipu variável. Ezemplu:

  • Direct plagiarism/plágio direito, lia-fuan ne’ebé dalabarak ema uza mak copy-paste. Ida ne’e signifika, hakerek nain ida foti loloos kedas ema seluk nia ideia sem iha sinál rekoñesementu ba fonte sira.
  • Self-plagiarism/autoplágio katak autór rasik uza fila-fali ninia obra sira. Ezemplu: estudante ida entrega ninia papél ne’ebé hanesan (reciclar) ba iha dosente seluk hodi hadia eh aumenta de’it lia-fuan balun.
  • Global plagiarism/plágio global, signifika entrega tomak ema seluk nia obra. Ezemplu: estudante ida, selu ema seluk hodi hakerek ninia traballu. (Helen 2016, 9).

Timor-Leste, nasaun soberana ida ne’ebé livre ona hosi kolonializmu, infelizmente sei enfrenta hela problema lubuk ida. Além problema ekonomia, sosiál, no polítika; edukasaun mós sei sai nafatin preokupasaun boot iha nasaun ida ne’e. Se haree hosi aspetu akadémiku, bele dehan seidauk iha klareza no serteza ida hodi hatudu katak estudante ou hakerek nain ida nu’udar plajiatór, maske akontese dau-daun, maibé laiha fasilidade sira hodi detekta problema ida ne’e.

Peskizadora amerikana, Rebecca Moore Howard mai ho konkuluzaun ida katak tanba ho ignoránsia ema barak komete plajiarismu, maibé mós iha ema balun ne’ebé komete intensionalmente, katak nia hatene no konsiente ba aktu ne’e rasik. Glenn Deckert fo énfaze maka’as no haree liu ba iha asaun ne’ebé ema ida halo la’ós intensaun. Nia afirma autór ida intensionalmente ou lae (copy-paste) ne’e la relevante tanba asaun (copy-paste) ne’ebé nia halo ne’e la aseitável (Wendy 2008, 23-25).

Peskiza hatudu katak plajiarizmu ne’e mosu tanba hakerek nain ida falta koñesementu konaba oinsá atu utiliza fonte no halo referénsia ba fonte sira (Diane 2013, 27). Menus koñesementu ba utilizasaun fontes, tuir loloos la’ós sai problema ida iha universidade sira, ezemplu iha Timor. Peskiza hatudu katak dalan di’ak atu hatán ba asuntu ida ne’e (plagiarizmu) mak presiza hatene problema ne’e ninia kauza (Diane 2013, 1). Se ‘ignoránsia’ mak sai hanesan kauza no sai razaun fundamentál hodi hamosu plajeatór, ida ne’e presiza tebes momentu atu halo avaliasaun no refleksaun klean ba iha kompetente sira. Razaun ne’e hanesan ‘basa’ (tamparan) boot ida ba iha instituisaun relevante no universidade sira em jerál.

Infelizmente, eskola no universidade sira balun iha ha’u rai doben Timor-Leste seidauk reflete didiak ideia ‘orientasaun’ ba estudante foun sira, liu-liu ba hirak ne’ebé foin aprende atu nani iha mundu akadémiku ninian. Loron orientasaun ne’e mak momentu oportunu atu mestre no dosente sira introdús sistema no métodu sira ne’ebé eskola eh universidade sira sei utiliza. Triste tebes bainhira haree iha notísia, kada tinan, iha momentu orientasaun ninian, estudante foun balun tenke sai vítima ba torturasaun hosi estudante seluk (panitia orientasi) tanba de’it misinterpretation ba ideia ‘orientasaun’ ne’ebé la reflekte loloos vizaun no misaun edukasaun ninian.

Kualidade orientasaun ne’ebé di’ak, por ezemplu; introdús ambiente eskola nian ba estudante foun sira, aprezenta livru manuál ne’ebé sei sai hanesan matadalan ba estudante sira, no esplika metodolojia ne’ebé sei uza iha universidade refere mak bele garante no ajuda hodi kontribui hatán ba problema ignoránsia ba plajiarizmu. Laiha dalan seluk atu solusiona problema ida, se ema ida la hatene problema ne’e ninia abut no hun ne’e iha ne’ebé.

Atu eveita plajiarizmu, la signifika evita uza fonte sira hanesan livru, jornál no sira seluk. Kestaun la’ós uza ou evita fonte sira, maibé importante mak maneira oinsá atu uza no rekoñese fonte sira. Iha maneira no estilu oi-oin ne’ebé hakerek nain eh estudante sira bele uza hodi halo referénsia ba fonte sira. Estilu sira hanesan; American Psychological Association (APA) Style, Modern Language Association (MLA), Chicago Style, Harvard no seluk-seluk tan. Konserteza, kada universidade iha ninia preferénsia ba estilu sira ne’ebé la hanesan. Hirak ne’e depende ba autoridade kompetente sira iha kada universidade. Nune’e, metodolojia hirak ne’e tuir loloos sai ona baze koñesementu ba estudante sira molok hahú sira-nia tinan akadémiku.

Hanesan temi ona iha leten katak plajiarizmu ne’e simplesmente ‘na’uk’, nune’e aktu ida ne’e konsidera nu’udar krime ida iha mundu akadémiku. Se ita haree Plajiarizmu ne’e amplamente, ida ne’e konsideradu krime akadémiku ne’ebé sériu no grave tebes (Diane 2013, 31). Enkuantu plajiarizmu ne’e krime, signifika iha mós ninia kastigu. Kestaun penalidade ne’e sei kabe ba kompeténsia hosi universidade ida-idak. Presiza tau iha konsiderasaun katak plajiarizmu ne’e simplesmente prejudika integridade akadémika. Signifika individu ou instituisaun ida bele lakon ninia reputasaun (Diane 2013, 11).

Infelizmente, universidade sira iha Timor seidauk iha sistema di’ak hodi detekta ou identifika plajiatór sira. Iha nasaun avansada sira, hanesan Xina, utiliza sistema database CrossCheck no Academic Manuscript Literature Checking (AMLC) (Helen 2016, 121). Inglatera, Austrália, Kanada, Amérika, Nova Zelándia no sira seluk, utiliza sistema dijitál ne’ebé hanaran Turnitin (Diane 2013, 164). Sistema hirak ne’e (CrossCheck, AMLC, Turnitin) fasilita tebes instituisaun no universidade sira hodi bele kompara estudante nia hakerek sira. Matenek nain sira hamosu sistema ida ne’e ho intensaun atu kombate problema plajiarizmu.

Iha fulan hirak liuba, prezidente Konsellu Exekutivu Institutu Nasional Siensia no Teknolojia (INCT), Dr. Cornélio Guterres deklara katak atu evita plajiarizmu, INCT iha ona planu atu sosa software ida ne’ebé bele detekta asaun ida ne’e. Esforsu maka’as no optimismu hosi prezidente INCT nian sai hanesan esperansa boot ba kualidade edukasaun iha rai doben Timor-Leste, liu-liu oinsá atu prevene plagiarizmu no sistema copyright.

Ho situasaun pandemia Covid-19, atividade sira barak ne’ebé la funsiona di’ak. Hanesan ho atividade sira seluk, edukasaun mós la’o lento demais. Ema hotu konsiente ho impaktu negativu hosi Covid-19, maibé ida ne’e labele sai bareira ou razaun atu ema ida lakohi ona atu aprende buat foun. Estudante, foinsa’e no matenek nain barak ne’ebé sai fini di’ak ba rai doben Timor-Leste, tempu ona atu espresa no atualiza imi-nia potensia sira iha mundu akadémiku. Mai ita hamutuk hodi dehan ‘lae’ ba krime, plajiarizmu.  Mai ita aprende atu rekoñese, konsidera no respeita ema seluk nia obra no ideia sira ne’ebé karik ita inklui iha ita-nia obra eh apresentasaun sira. Hodi koñese métodu no tuir matadalan sira estilu oinsá halo referénsia ba fonte sira (livru, jornál, informasaun sira hosi internet) mak ita bele evita ita-nia án no defende ita-nia dignidade akadémika hodi la simu títulu foun, plajiatór (Diane 2013, 11).

Hakerek nain alumni İnstituto Filósofico de Săo Francisco de Sales (İFFS).

Bibliografia

“Plagiarism.” In Collins Online Dictionary.https://www.collinsdictionary.com/dictionary/english/accusations-of-plagiarism asesu iha 23 de Juñu, 2021.

Marsh, Bill. Plagiarism: Alchemy and Remedy in Higher Education. Albany: State University of New York Press, 2007.

Pecorari, Diane. Teaching to Avoid Plagiarism: How to promote good source use. New York: Open University Press, 2013.

Sutherland-Smith, Wendy. Plagiarism, the Internet and Student Learning: Improving Academic Integrity. New York: Routledge, 2008.

Zhang, Yuehong (Helen). Against Plagiarism: A Guide for Editors and Authors. London: Springer International Publishing, 2016.

1 KOMENTÁRIU

  1. Bravo…finalmente Irmao hakerek kona ba Plajiarismu ne’e. Tanba ita nia Dosente sira tantu iha UNTL, UNPAZ, UNDIL no sluk tan la liga liu tanba plajiarizmu iha Asiatiku liu2 iha Indonesia ladun hetan atensaun. Ho nune’e ita maluk barak tanba gradua hsi Indonesia ladun prekupa ho kestaun ne’e. espera katak maluk ka Collega sira servisu nudar Dosente bele lei ita nia artigu ida ne’e. Kapas no informativu tebes. Parabens @@@

HAKEREK NO HATÁN

Please enter your comment!
Please enter your name here