Agustinha de Jesus, negosiante iha Merkadu Taibessi, Dili. Imajen Tatoli/ Arminda Fonseca

DILI, 01 jullu 2021 (TATOLI)-Negosiante-sira ne’ebé durante fa’an modo iha Merkadu Manleuana ho Taibessi, sente kaman ona tanba sira-nia modo ne’ebé fa’an hahú folin fali ona.

Kompradór-sira komesa hakat fali ona ba merkadu hodi kompara nesesidade, hanesan modo-tahan, ai-fuan no nesesidade báziku sira seluk, hafoin Governu hakotu konfinamentu domisiliáriu iha Munisípiu Dili.

“Bainhira sei iha tempu konfinamentu obrigatóriu, ami-nia modo-tahan fa’an laiha folin to’o balun namlaek no dodok de’it. Agora di’ak ona tanba kompradór-sira mai fali ona merkadu hodi sosa modo-tahan, ai-fuan no seluk-seluk tan,” Agustinha de Jesus, nu’udar negosiante iha Merkadu Taibessi hateten ba Agência Tatoli iha Merkadu Taibessi, Dili, kinta ne’e.

Daudaun ne’e, Agostinho de Jesus, dehan, rendimentu loron ida bele hetan entre $50,00 to’o $100,00 tanba ema komesa movimentu barak ona ba merkadu hodi kompra sira-nia nesesidade loron-loron nian.

Ana de Oliveira, negosiante ida iha Merkadu Manleuana hato’o agradese ba Governu tanba hafoin hakotu konfinamentu obrigatóriu, komunidade komesa ba sosa fali ona sasán iha merkadu.

“Ha’u agradese ba Governu tanba bainhira hakotu konfinamentu domisiliáriu ema no transporte públiku hahú movimentu fali ona tama-sai merkadu halo kompras,”  nia hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here