Diretór Jerál Peska MAP, Acacio Guterres. Imajen TATOLI/Natalino Costa

DILI, 01 jullu 2021 (TATOLI)–Diretór Jerál Peska hosi Ministériu Agrikultura no Peska (MAP), Acacio Guterres, informa, parte ministériu hahú halo ona koordenasaun ho Komisaun Naionál Aproviozionamentu (CNA, sigla portugés) hodi ko’alia kona-ba prosesu akizisaun ró indústria peska rua ne’ebé sei kontrui iha tempu badak.

“Dokumentu kona-ba akizisaun ró rua, semana kotuk ami halo ona aprezentasaun iha Konsellu Ministru loron 23 juñu no hetan apresiasaun atu  autoriza  halo prosesu  akizasaun ne’e. Agora ami ko’alia ona ho Komisaun Nasionál Aproviozionamentu atu prosesu ró ne’e ba oin,” Diretór Jerál informa iha salaun MAP, Comoro, kinta ne’e.

Notísia relevante: Governu loke konkursu públiku akizisaun ró peska industriál rua

Tuir Dirijente ne’e, ró ida espesiá ba kail no seluk ba rede tanba ró rua ne’e espesífiku ba indústria peska.

“Durante ne’e ita-nia prezensa iha tasi laiha, entaun ho ró rua ne’e ita espera bele halo atividade peska iha tasi no ba aban bainrua hatudu katak tasi Timór ne’e iha na’in, se lae ema mai naok hotu ita-nia ikan,” nia akresenta.

Diretór dehan, ró rua ne’e sei konstrui la’ós sosa feitu, ho medida boot 250 BT, tanba ne’e presiza iha koordenasaun ho parte kompetente hodi haree didi’ak prosesu.

“Konkursu ne’e ita sei fó ba kompañia internasionál, tanba ita seidauk iha kompañia nasionál ne’ebé konstrui ró no seidauk hatene ró rua ne’e atu halo iha ne’ebé tanba CNA sei prosesu,” nia hatutan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here