Sentru Juventude Viqueque. Imajen Tatoli/Vitorino Lopes da Costa.

VIQUEQUE, 01 jullu 2021 (TATOLI)-Diretór Edukasaun Munisípiu Viqueque, Emidio Amaral, informa iha ona informasaun hosi administradór Munisípiu Viqueque atu konvoka enkontru konsellu konsultivu hosi Munisípiu Viqueque atu diskute no tetu re-ativa ensinu aprendizajen perenjiál.

Notísia Relevante : Unicef apoia máskara 21.777 ba edukasaun Viqueque

“Se iha enkontru mak konsellu konsultivu sei foti desizaun atu re-ativa prosesu aprendizajen prejensiál,” Emidio Amaral hateten ba Agência Tatoli iha Viqueque, kinta ne’e.

Maske aban-bainrua deside re-ativa eskola-sira, maibé tenke kumpre nafatin protokolu saúde públiku, hanesan eskola prepara bee-moos ho sabaun hodi fasilita estudante sira fase-liman, uza máskara no distánsia fíziku.

Hosi sorin seluk, jestór operasionál Sentru Juventude Viqueque, Juvinal da Costa hateten, tama Estadu emerjénsia Sentru Juventude fó formasaun hanesan ingles, portugés, komputadór ba juventude sira iha Munisípiu Viqueque, maibé iha estadu emerjénsia no serka sanitária formasaun ba juventude suspende.

“Uluk seidauk tama estadu emerjénsia ne’e, ami fó formasaun ba juventude sira, maibé tama estadu emerjénsia formasaun mós lala’o. Iha estadu emerjénsia nian laran ami halo sensibilizasaun ba joven sira, ami hein bainhira mak eskola sira re-ativa hodi ami mós bele fó formasaun ba ita-nia juventude sira,” Juvinal da Costa hateten.

Nia dehan, maske atividade formasaun atualmente taka provizóriu, maibé sentru juventude Viqueque halo sensibilizasaun kona-ba utiliza media sosiál ho saudavel hanesan Facebook, Instagram no WhatsApp.

“Ami halo sensibilizasaun liuhosi zoom meting hodi fó hanoin ba joven sira para utiliza media sosiál ne’e ho saudavel,” nia tenik.

Sentru Juventude Viqueque hetan apoiu fundu operasionál 40% hosi Sekretáriu Estadu Juventude no Desportu (SEJD) hosi fulan janeiru to’o juñu ezekuta ona orsamentu hamutuk $ 10.472.00 aloka ona ba atividade hosi sentru juventude nian.

Jornalista       : Vitorino Lopes da Costa
Editór             : Francisco Simões

HAKEREK NO HATÁN

Please enter your comment!
Please enter your name here